Gujarati News

અમદાવાદ,તા. ૨૭ : આમ આદમી પાર્ટી (AAP) દ્વારા ૩૦૦ યુનિટ મફત વીજળી પૂરી પાડવાની જાહેરાતનો સામનો કરવા માટે ભાજપ સરકાર દ્વારા તૈયાર કરવામાં આવેલા આંતરિક અહેવાલમાં લાભ માટે દર વર્ષે ૭,૭૦૦ કરોડ રૂપિયાનો નાણાકીય બોજ પડવાનો અંદાજ મૂક્‍યો છે.

રાજયમાં કુલ ૧.૬૧ કરોડ ઘરેલું વીજળી જોડાણોમાંથી, જેઓ દર મહિને ૩૦૦ યુનિટ કરતાં ઓછી વીજળી વાપરે છે તેમની રકમ લગભગ ૧.૨૧ કરોડ હતી. ‘રાજય સરકારે ૧.૨૧ કરોડ જોડાણોને મફત વીજળી આપવા માટે રૂ. ૭,૭૦૦ કરોડની વધારાની જોગવાઈ કરવી પડશે,' સૂત્રએ જણાવ્‍યું હતું. ‘રાજય સરકાર દર વર્ષે ખેડૂતોને ૮,૪૦૦ કરોડ રૂપિયાની કૃષિ પાવર સબસિડી આપી રહી છે,' તેમણે ઉમેર્યું.

દિલ્‍હી અને ગુજરાત માટે સમાન માપદંડ લાગુ કરવું શક્‍ય ન હોવાનું જણાવતા, સૂત્રોએ જણાવ્‍યું હતું કે દિલ્‍હીમાં ૫૮.૩૦ લાખ ઘરેલું વીજ જોડાણો છે જેમાંથી માત્ર ૧૪.૧૦ લાખ દર મહિને ૩૦૦ યુનિટ કરતાં ઓછી વીજળી વાપરે છે. ‘ગુજરાતમાં સબસિડીનો બોજ ઘણો વધારે છે એટલું જ નહીં, પરંતુ ગુજરાતમાં ફયુઅલ એડજસ્‍ટમેન્‍ટ ચાર્જીસ પણ દિલ્‍હી કરતા ઘણા ઓછા છે,' સૂત્રોએ જણાવ્‍યું હતું.

સૂત્રોનો દાવો છે કે રાજયની ભાજપ સરકારનું માનવું છે કે રાજકીય લાભ માટે આવી કોઈપણ વધારાની સબસિડીથી રાજયની તિજોરી અને કરદાતાઓ પર લાંબા ગાળાનો બોજ પડશે, જે લાંબા ગાળે ભાજપની રાજકીય સંભાવનાઓ માટે હાનિકારક સાબિત થશે.

AAP કન્‍વીનર અરવિંદ કેજરીવાલે વાયદો કર્યો હતો કે જો તેમની પાર્ટી ગુજરાતમાં સત્તા પર આવશે તો ૩૦૦ યુનિટ સુધી મફત વીજળી આપવામાં આવશે. AAPએ દિલ્‍હી અને પંજાબમાં તેના મફત પાવર ચૂંટણી વચનનો અમલ કર્યો છે, જયાં તે સત્તામાં છે.