Gujarati News

અમદાવાદ,તા.૩૧ : અમદાવાદ શહેરના સેટેલાઈટ વિસ્તાર રહેતા લેડીઝ ટેલરે મેડિક્લેમ મંજૂર કરાવવા ઈનશ્યોન્સ કંપનીમાં ખોટા દસ્તાવેજો રજૂ કરતા સેટેલાઈટ પોલીસ સ્ટેશનમાં છેતરપિંડીની ફરિયાદ નોંધાઈ છે.

પ્રાપ્ત માહિતી પ્રમાણે ટેલરને કોરોના થતાં તેના ઓળખીતા ડોક્ટરે દવા લખી આપીને ઘરે જ સારવાર કરવા જણાવ્યું હતું. પરંતુ દર્દીએ મેડિક્લેમ મંજૂર કરાવવા માટે ડોક્ટરની હોસ્પિટલમાં સારવાર લીધી હોવાના ઈન્સ્યોરન્સ કંપનીમાં ખોટા દસ્તાવેજો રજુ કર્યા હતા. જેને પગલે ડોક્ટરે તેની સામે સેટેલાઈટ પોલીસ સ્ટેશનમાં ફરિયાદ કરતા વધુ તપાસ હાથ ધરવામાં આવી છે.

પ્રાપ્ત વિગતો પ્રમાણે બોડકદેવમાં શીતલ પ્લાઝા ખાતે રહેતા ડો. ભાવેશ ઓઝા સેટેલાઈટમાં અક્ષરજ્યોત કોમ્પ્લેક્સ ખાતે શિવમ હોસ્પિટલ ધરાવે છે. તેમની હોસ્પિટલની બાજુમાં ટેલરની દુકાન ધરાવતા શિવાભાઈ ચુનીલાલ પરમાર અવારનવાર તેમની હોસ્પિટલમાં દવા લેવા માટે આવતા હોવાથી ડો. ભાવેશ તેમને ઓળખતા હતા.

૨૬ માર્ચ ૨૦૨૧ના રોજ શિવાભાઈ બીમાર થતાં ભાવેશભાઈની હોસ્પિટલમાં દવા લેવા આવ્યા હતા. જો કે, કોરોનાનો ટેસ્ટ કરાવતા શિવાભાઈનો રિપોર્ટ પોઝિટિવ આવ્યો હતો. જેથી તેમણે હોસ્પિટલમાં દાખલ કરવા માટે કહ્યું હતું, પરંતુ શિવાભાઈની તબિયત સારી હોવાથી ડો. ભાવેશે તેમને ઘરે જ સારવાર લેવા માટે જણાવ્યું હતું.

આ દરમિયાન ૪ મેના રોજ આઈસીઆઈસીઆઈ લોમ્બાર્ડ કંપનીના કર્મચારી તેજસભાઈ વેરીફિકેશન કરવા હોસ્પિટલ આવ્યા હતા અને ડો. ભાવેશને શિવાભાઈના જરૂરી ડોક્યુમેન્ટ બતાવ્યા હતા. સાથે જ શિવાભાઈ હોસ્પિટલમાં દાખલ અને ડિસ્ચાર્જ થયા અંગેના ફોર્મ પણ બતાવ્યા હતા. આ ઉપરાંત હોસ્પિટલના લેટર પેડ પર આપેલ દવા તથા સમરી ભરેલી હતી.

જો કે, ડો. ભાવેશે તપાસ કરતા તેમની હોસ્પિટલનો લેટર પેડ ખોટો હતો અને હોસ્પિટલનો સિક્કો પણ ખોટો હતો. એટલું જ નહીં, શિવાભાઈએ ડો. ભાવેશની સહી પણ જાતે કરી હોવાનું સામે આવ્યું હતું.

જેથી ડો. ભાવેશે શિવાભાઈ તેમની હોસ્પિટલમાં દાખલ થયા નથી તે તેમણે સહી સિક્કા પણ કરી આપ્યા ન હોવાની જાણ કરતો લેટર ઈન્શ્યોરન્સ કંપનીને આપ્યો હતો. સમગ્ર મામલે ડો. ભાવેશ સેટેલાઈટ પોલીસમાં ફરિયાદ નોંધાવતા પોલીસે કાયદેસરની કાર્યવાહી હાથ ધરી છે.