Gujarati News

નવી દિલ્હી: લ સાલ્વાડોરમાં એબોર્શનને લગતાં કડક કાયદા બનાવાયા છે. તેના કારણે અકસ્માતે પણ જો મહિલાને એબોર્શન થઈ જાય તો સજા ભોગવવી પડે છે. એ કાયદા હળવા કરવાની માગ ઉઠી છે.

અલ સાલ્વાડોરમાં સારા રોગેલ ગાર્સિયા નામની એક 20 વર્ષની ગર્ભવતી યુવતીનો પગ લપસી ગયો હતો. એ અકસ્માતમાં તેના પેટમાં બાળકનું મોત થઈ ગયું હતું. મહિલાને હોસ્પિટલમાં સારવાર અપાઈ અને તે ભાનમાં આવી કે તરત જ તેને જેલમાં ધકેલી દેવામાં આવી હતી. અલ સાલ્વાડોરમાં એબોર્શનના કાયદા બહુ જ કડક હોવાથી એ મહિલા પર કેસ ચાલ્યો હતો અને તેને 20 વર્ષની સજા ફટકારવામાં આવી હતી. એબોર્શનને હત્યા ગણીને કેસ ચલાવવામાં આવે છે. જોકે, મહિલાને 9 વર્ષની કેદ પછી છોડી મૂકવામાં આવી હતી.

2012માં સજા પામેલી આ યુવતીએ હવે જેલમાંથી મુક્ત થયા પછી એબોર્શનના કાયદા હળવા કરવાની ઝુંબેશ ચલાવી છે. વુમેન રાઈટ્સ ગુ્રપના સભ્યોએ સરકાર સમક્ષ એબોર્શનના કાયદામાં છૂટછાટ આપવાની માગણી કરી છે. આ મહિલાઓએ દલીલ કરી હતી કે અતિશય કડક કાયદાના કારણે અસંખ્ય નિર્દોષ મહિલાઓએ પણ સજા ભોગવવી પડે છે. કાયદામાં અકસ્માત બાદ થયેલા એબોર્શનના મુદ્દે કોઈ જ છૂટછાટ મળતી ન હોવાથી અસંખ્ય મહિલાઓએ પરેશાની ભોગવવી પડે છે. સારાએ કહ્યું હતું કે કડક કાયદાના કારણે ઘણી ગર્ભવતી મહિલાઓને ડોક્ટરની સુવિધા પણ મળતી નથી. ક્રિટિકલ ડિલિવરીના કિસ્સામાં ડોક્ટર્સ જ કેસ હાથમાં લેતા નથી. એટલું જ નહીં, અકસ્માતના કારણે એબોર્શન થયું હોવા છતાં કોર્ટમાં એ માન્ય રાખવામાં આવતું નથી. તેના કારણે અસંખ્ય મહિલાઓ જેલમાં બંધ છે.