Gujarati News

ઉન્નાવ, તા. ૨: નવા વર્ષ ૨૦૨૧ના પ્રથમ દિવસે સવારે લખનઉ-આગ્રા એકસપ્રેસ હાઈવે પર સર્જાયેલા ભયંકર અકસ્માતની ઘટનામાં ૪ લોકોના મોત થયા છે જયારે ૭ લોકો ગંભીરરીતે ઈજાગ્રસ્ત થયા છે. સવારે કડકડતી ઠંડીના કારણે વાતાવરણમાં ગાઢ ધુમ્મસ છવાયેલુ હતું અને ત્યાં હાઈવે પર ઊભેલા એક વિશાળ કન્ટેનર ટ્રકમાં પાછળથી આવી રહેલી મોટી બસ ઘૂસી જતા અકસ્માત સર્જાયો હતો. હાઈવે પર ઊભેલા કન્ટેનર ટ્રકમાં બસ ઘૂસી જતા ગભરાઈ ગયેલા કેટલાંક પેસેન્જર્સે બારીનો કાચ તોડીને બહાર નીકળીને પોતાનો જીવ બચાવ્યો હતો.

પ્રાપ્ત માહિતી મુજબ, શુક્રવાર સવારે ઉત્ત્।રપ્રદેશના ઉન્નાવમાં લખનઉ-આગ્રા એકસપ્રેસ વે પર ગાઢ ધુમ્મસના કારણે રસ્તા પાસે પાર્ક કરવામાં આવેલા એક કન્ટેનર ટ્રકમાં ડબલ ડેકર બસ ઘૂસી ગઈ હતી. આ અકસ્માતમાં બસમાં સવાર ૪ મુસાફરોના મોત થયા છે અને ૭ મુસાફરો ગંભીરરીતે ઘાયલ થયા છે. પોલીસના જણાવ્યા મુજબ, આ બસમાં લગભગ ૭૦થી ૭૫ પેસેન્જર્સ હતા અને આ બસ બિહારથી દિલ્હી જઈ રહી હતી. હાઈવે પરના આ કન્ટેનર ટ્રકનો ચાલક ત્યાંથી ભાગી ગયો છે.

આ અકસ્માતમાં ઘાયલ તમામ લોકોને સારવાર માટે નજીકની હોસ્પિટલ લઈ જવામાં આવ્યા છે. ઘટનાસ્થળે પોલીસ અને રેસ્કયુ ટીમ પહોંચી ગઈ હતી. જયારે બીજી બાજુ અકસ્માતની આ ઘટનામાં ૫ ફૂટ સુધી કન્ટેનર ટ્રકની અંદર ઘૂસેલી બસને ક્રેઈનની મદદથી બહાર કાઢવામાં આવી હતી. આ અકસ્માતની ઘટના બાદ તે હાઈવે પર ભાગદોડ મચી ગઈ હતી.