Gujarati News

મૉસ્કો, તા.૩ : ડોક્ટરોને ભગવાનનો અવતાર કહેવામાં આવે છે અને રશિયામાં ડોક્ટરની એક ટીમે આ વાત સાબિત કરી દીધી છે. મૉસ્કોથી પૂર્વમાં સ્થિત બ્લાગોવેશચેંસક શહેરના એક હોસ્પિટલના ઉપરના માળ પર એકાએક આગ લાગી ગઈ. આ સમયે ડોક્ટરોની એક ટીમ એક દર્દીની ઓપન હાર્ટ સર્જરી કરી રહી હતી. ડોક્ટરોએ સુરક્ષિત ભાગવાના બદલે દર્દીનું ઓપરેશન પૂરુ કર્યું, કારણકે જો દર્દીને તે સમયે છોડી દેવામાં આવે અથવા શિફ્ટ કરવાનો પ્રયત્ન કરવામાં આવે તો તેનો જીવ જઈ શકતો હતો.

રશિયાની ઈમરજન્સી મિનિસ્ટ્રીએ જણાવ્યું કે આઠ ડોક્ટર અને નર્સોની એક ટીમે દર્દીને સુરક્ષિત સ્થળ પર લઈ જતા પહેલા બે કલાકનો સંઘર્ષ કરીને ઓપરેશન સમાપ્ત કર્યું. ડોક્ટરો પાસે તક હતી કે તેઓ પોતાનો જીવ બચાવીને દર્દીને મુકીને બહાર નીકળી શકતા હતા, પરંતુ તેમણે માનવતાનું ઉદાહરણ પૂરું પાડ્યુ અને સફળતાપૂર્વક ઓપરેશન પૂરુ કર્યું.

ત્યારપછી બે કલાકની સખત મહેનત પછી હોસ્પિટલના ઉપરના માળ પર લાગેલી ભીષણ આગ પર કાબૂ મેળવવામાં આવ્યો. વાયરલ થયેલા આ વીડિયોમાં હોસ્પિટલના ઉપરના માળથી આગની જ્વાળાઓ સ્પષ્ટ જણાઈ રહી છે. પ્રથમ દ્રષ્ટિએ કોઈ પણ આ આગને જોઈને ડરી જાય, પરંતુ ફાયર ડિપાર્ટમેન્ટની ટીમે બહાદુરી દાખવીને આગને હોસ્પિટલમાં ફેલાતા રોકી લીધી.

દર્દીનું ઓપરેશન કરી રહેલા સર્જન વૈલેન્ટિન ફિલાટોવે મીડિયાને જણાવ્યું કે, અમારી પાસે અન્ય કોઈ વિકલ્પ નહોતો, અમે કોઈ પણ ભોગે દર્દીનો જીવ બચાવવા માંગતા હતા. અમે અમારી ક્ષમતાનો સંપૂર્ણ ઉપયોગ કર્યો. આ હાર્ટ સર્જરી હતી માટે દર્દીને છોડી શકાય નહીં.