Gujarati News

મેરઠ,તા. ૩:  એક કુખ્યાત ગેંગસ્ટરને એન્કાઉન્ટરમાં ઠાર કરનારા પોલીસ ઈન્સ્પેકટરને હાલના દિવસોમાં અંડરગ્રાઉન્ડ થઈ જવાનો વારો આવ્યો છે. નવાઈની વાત એ છે કે હજુ ૧૫મી ઓગસ્ટે જ આ પરાક્રમી ઈન્સ્પેકટરને મેડલથી નવાજવામાં આવ્યા હતા. જોકે, મેડલ મળ્યાના પંદર જ દિવસમાં આ પીઆઈ વિરુદ્ઘ એક લાખ રુપિયાનો કથિત તોડ કર્યો હોવાની તેમના જ પોલીસ સ્ટેશનમાં ફરિયાદ નોંધાયા બાદ હાલ તેઓ નાસતા ફરી રહ્યા છે.

ચોરીનો ટ્રક ખરીદવાના આરોપમાં પકડાયેલા એક ભંગારના વેપારીની સામે કાયદાકીય કાર્યવાહી ના કરવા બદલ તેની પાસેથી ઈન્સ્પેકટર વિરેન્દ્રપાલસિંહ રાણાએ કથિત રીતે એક લાખ રુપિયા પડાવ્યા હતા. મેરઠ જિલ્લાના સદર પોલીસ સ્ટેશનમાં SHO તરીકે ફરજ બજાવતા ઈન્સ્પેકટર રાણા હાલ લાંચ લેવાના કેસમાં વોન્ટેડ છે. જિલ્લા એસપી વિનિત ભટનાગરના જણાવ્યા અનુસાર તેમનો હાલ કોઈ પત્ત્।ો નથી. તેમની સાથે એક હેડકોન્સ્ટેબલ મનમોહન સિંદ્ય વિરુદ્ઘ પણ લાંચ લેવાનો કેસ કરવામાં આવ્યો છે. કોન્સ્ટેબલને તો ૫૦ હજારની લાંચ લેતા રંગેહાથ ઝડપવામાં આવ્યો હતો.

વોન્ટેડ ઈન્સ્પેકટર રાણાએ હજુ તો થોડા દિવસ પહેલા જ પોતાના પોલીસ સ્ટેશનને ભ્રષ્ટાચાર મુકત જાહેર કર્યું હતું. તેમણે બહાર એક બોર્ડ પણ મૂકાવ્યું હતું, જેમાં કોઈપણ કામ માટે લાંચ માગવામાં આવે તો તેની જાણ કરવા માટે જણાવ્યું હતું. જોકે, સૂફિયાણી વાતો કરતા ઈન્સપેકટર પોતે જ તોજબાજી કરી રહ્યા હોવાનો જિલ્લા પોલીસ વડાને શક પડ્યો હતો. ટ્રક ચોરીની એક FIRમાં કેટલાક મહત્વના મુદ્દા ગાયબ હોવાથી તેની તપાસ IPS કક્ષાના એક અધિકારીને સોંપવામાં આવી હતી.

તપાસમાં બહાર આવ્યું હતું કે, ઈન્સ્પેકટર રાણા અને તેમનો કોન્સ્ટેબલ ભંગારના એક વેપારીને હેરાન કરી રહ્યા હતા. પોલીસે આ વેપારીનો સંપર્ક કરી તેની સાથે વાત કરી હતી. તેણે જણાવ્યું હતું કે રાણા અને તેમનો કોન્સ્ટેબલ તેમની પાસેથી પૈસાની ડિમાન્ડ કરી રહ્યા છે. બંનેને રંગેહાથ પકડવા માટે સિનિયર અધિકારીઓ દ્વારા છટકું ગોઠવવામાં આવ્યું હતું. જેમાં કોન્સ્ટેબલ ૫૦ હજાર રુપિયા લેતા રંગેહાથ ઝડપાઈ ગયો હતો. જયારે પોતાના સુધી પણ રેલો આવતો જોઈ ઈન્સ્પેકટર રાણા રાતોરાત ભૂગર્ભમાં ઉતરી ગયા હતા.

ઉલ્લેખનીય છે કે, ૨૦૧૪માં દિલ્હીના લાજપથનગરમાં આઠ કરોડ રુપિયાની સનસનીખેજ લૂંટ કરનારા શિવ શકિત નાયડૂ નામના એક કુખ્યાત શખસનું ગયા વર્ષે યુપી પોલીસે એન્કાઉન્ટર કર્યું હતું. આ એન્કાઉન્ટર કરનારી ટીમમાં ઈન્સપેકટર રાણા પણ સામેલ હતા. જેના બદલ તેમને ૧૫મી ઓગસ્ટે મેડલ આપીને નવાજવામાં આવ્યા હતા. જોકે, મેડલ મળ્યાના ૧૫ દિવસમાં જ ઈન્સ્પેકટર રાણા હીરોમાંથી વિલન બની ગયા છે, અને તેમના પર ધરપકડની તલવાર લટકી રહી છે.