Gujarati News

લંડન, તા. ૪ : બ્રિટનમાં ૧૨થી ૧૫ વર્ષના બાળકો માટે ફાઈઝર-બાયોએનટેકની કોરોના વાયરસ વેક્સીનને મંજૂરી આપી દેવાઈ છે. ઈમર્જન્સી માટે દેશના રેગ્યુલેટર્સે તેના ઉપયોગની મંજૂરી આપી દીધી છે. આ અહેવાલ એવા સમયે આવ્યા છે, જ્યારે ઘણા એક્સપર્ટસે કોરોનાની આગામી લહેર આવવા પર બાળકો ઝપેટમાં આવવાની આશંકા વ્યક્ત કરી છે. આ પહેલા કેનેડા અને અમેરિકાના રેગ્યુલેટર્સએ આ જ પ્રકારની આશંકા વ્યક્ત કરી હતી.

કંપની તરફથી અપાયેલા ડેટાના આધાર પર મેડિસીન્સ એન્ડ હેલ્થકેર પ્રોડક્ટ્સ રેગ્યુલેટર્સ એજન્સીને પોતાના અસેસમેન્ટમાં જાણવા મળ્યું કે, વેક્સીનથી થતા ફાયદા તેની સાથે જોડાયેલા રિસ્કથી વધુ છે. આ પહેલા યુરોપિયન મેડિસિન્સ એજન્સીએ ફાઈઝરની વેક્સીનને ૧૨થી ૧૫ વર્ષ સુધીના બાળકોને આપવાની ભલામણ કરી હતી. આ નિર્ણય મહામારી દરમિયાન આ મહાદ્વીપમાં પહેલી વખત બાળકોને વેક્સીન લગાવવાનો રસ્તો ખોલી રહ્યો છે.

ફાઈઝર-બાયોએનટેકની વેક્સીનને ૨૭ દેશોના યુરોપીય સંઘમાં સૌથી પહેલા મંજૂરી મળી હતી અને ડિસેમ્બરમાં ૧૬ વર્ષ કે તેનાથી વધુ ઉંમરના લોકોને આપવા માટે તેને લાઈસન્સ અપાયું હતું. ઈએમએ દ્વારા બાળકોને રસી આપવાની મંજૂરી આપવાની ભલામણ અમેરિકામાં ૨,૦૦૦થી વધુ બાળકો પર કરાયેલા સ્ટડી પર આધારિત છે. સ્ટડીમાં વેક્સીન સુરક્ષિત અને પ્રભાવી જણાઈ છે. રિસર્ચર્સ બાળકોમાં આગામી બે વર્ષ સુધી રસીના ડોઝની લાંબાગાળાની સુરક્ષા પર નજર રાખશે. ફાઈઝરની ભારતમાં પણ કોઈ વેક્સીનની મંજૂરી પહેલા સ્થાનિક પરીક્ષણ મામલે સરકાર સાથે વાતચીત ચાલી રહી હતી. તેમાં પણ કંપનીને છૂટ મળી ગઈ છે.

આ પહેલા ફાઈઝર ટ્રાયલની શરત પછી ઈમર્જન્સી ઉપયોગની અરજી પાછી ખેંચી લીધી હતી. તો, ફ્રાન્સમાં કરાયેલી એક સ્ટડીમાં જણાયું હતું કે, ભારતમાં મળેલા કોરોના વેરિયન્ટ સામે ફાઈઝરની વેક્સીન અસરકારક છે. એક સરકારી અધિકારીએ પહેલા શક્યતા વ્યક્ત કરી હતી કે, જુલાઈ સુધીમાં ભારતમાં ફાઈઝરની વેક્સીન આવી જશે.