Gujarati News

જયપુર, તા. ૫ : કોરોના સામેની જંગ લડવામાં સૌથી અગ્રેસર મેડિકલ સ્ટાફ છે. કોરોના મહામારી શરુ થઈ ત્યારથી ડોક્ટરો દિવસ રાત એક કરીને દર્દીઓના જીવ બચાવવા માટે પ્રયાસ કરી રહ્યા છે. ઘણાં ડોક્ટરો એવા છે જે પોતાની ફરજથી આગળ વધીને દર્દીઓની સેવા કરતા હોય છે. આવા જ એક ડોક્ટર છે જયપુરની ચીફ મેડિકલ હેલ્થ ઓફિસમાં મેડિકલ ઓફિસર તરીકે ફરજ બજાવતા ડોક્ટર સતિષ મિશ્રા.

ડોક્ટર સતિષે જોયું કે ભુતાનની એક મહિલા પોતાની કેન્સર પીડિત માતા માટે પ્લાઝ્માની શોધમાં છે જેમની સારવાર કોલકાતામાં ચાલી રહી છે. મહિલાને ૭૦ યુનિટ પ્લાઝ્માની જરુર હતી. ડોક્ટર સતિષે દિવસ-રાત એક કરીને બ્લડ ડોનર્સનો સંપર્ક કર્યો અને પ્લાઝ્માના ૬૦ યુનિટની વ્યવસ્થા કરી આપી. શુક્રવારના રોજ ડોક્ટરે જણાવ્યું કે, હું કોરોનાના દર્દીઓ માટે ઓક્સિજન અને બેડની વ્યવસ્થામાં લાગેલો હતો અને તે દરમિયાન એક દિવસ મેં સોશિયલ નેટવર્કિંગ પ્લેટફોર્મ પર એક પોસ્ટ જોઈ. આ પોસ્ટમાં ભુતાનની એક મહિલા ત્શેરીંગ ત્શોમોએ પોતાની ૫૬ વર્ષીય માતા માટે પ્લાઝમાની વ્યવસ્થા કરવાની વિનંતી કરી હતી. મેં વાંચ્યું કે તેની માતા કેન્સર પીડિત છે અને ઓછામાં ઓછા ૭૦ યુનિટની તેમને જરૂર છે. મને તે રાતે ઊંઘ નહોતી આવી. મને વિચાર આવ્યો કો ભુતાનના આ લોકોને કલકત્તામાં બ્લડ ડોનર્સ કઈ રીતે મળશે? તેમની મદદ કોણ કરશે?

બીજા દિવસે ડોક્ટર મિશ્રાએ પોતાના સંપર્કમા હોય તેવા ડોનર્સની યાદી જોઈ અને વિક્રમ દધીચ નામના એક રક્તદાતાનો સંપર્ક કર્યો. વિક્રમનું દેશભરમાં બ્લડ ડોનર્સનું એક ગ્રુપ છે. ડોક્ટર મિશ્રા જણાવે છે કે, અમે ૬૦ એવા લોકો શોધી શક્યા જે દર્દીને લોહી આપવા માટે તૈયાર હતા. અત્યારે તેમને હોસ્પિટલમાંથી રજા આપવામાં આવી છે. હું ભગવાનનો આભાર વ્યક્ત કરુ છું કે વિક્રમજીની મદદથી અમે તે મહિલાની મદદ કરી શક્યા.

વિક્રમ આ બાબતે જણાવે છે કે, મેં મારા સોશિયલ નેટવર્કિંગ અકાઉન્ટ પર મિશ્રાજીની રિક્વેસ્ટ જોઈ. તેમણે મારી પાસે મદદ માંગી હતી. તેમણે કોલકાતાના અન્ય ડોનર્સનો પણ સંપર્ક કર્યો અને થોડા ડોનર્સ અન્ય શહેરોમાંથી પણ આવ્યા હતા. પ્લાઝ્મા મળ્યા પછી મહિલાને હોસ્પિટલમાંથી રજા આપવામાં આવી. દર્દી અને તેના પરિવારે ડોક્ટર મિશ્રા તેમજ ભારત દેશનો આભાર વ્યક્ત કર્યો ત્શેરિંગે જણાવ્યું કે, હું માત્ર ડોક્ટર મિશ્રા જ નહીં પ્રત્યેક ભારતીયનો આભાર વ્યક્ત કરુ છું. જ્યારે ડોક્ટરોએ કહ્યું કે મારી માતાને ૭૦ યુનિટ પ્લાઝમા જોઈશે તો મને અંદાજો નહોતો કે હું કઈ રીતે વ્યવસ્થા કરીશ. અમે આ મદદને આજીવન યાદ રાખીશું. ભારત દેશ અત્યારે પોતે કોરોના સામેની જંગ લડી રહ્યો છે, તેવી કપરી સ્થિતિમાં અહીંના લોકો અમારી મદદ માટે આગળ આવ્યા. ભારત એક મહાન દેશ છે. મારી માતાને શુક્રવારે હોસ્પિટલમાંથી રજા આપવામાં આવી. અમે ડોક્ટરની સલાહ અનુસાર નક્કી કરીશું કે અમે ભુતાન ક્યારે પાછા જઈશું.