Gujarati News

લંડન, તા.૫: કોરોનાના વધી રહેલા કેસોને જોતા યુકેમાં લોકડાઉન જાહેર કરવામાં આવ્યું છે. જેમાં જીમ પણ બંધ રહેવાના છે. જોકે, ઘણી જગ્યાએ લોકડાઉનનો વિરોધ કરવામાં આવી રહ્યો છે. તેવામાં જીમ બંધ રહેવાના છે તેના વિરોધમાં પ્રદર્શનકારીઓએ લંડનમાં હાઉસ ઓફ પાર્લામેન્ટ ખાતે ટેન્ક લાવીને વિરોધ વ્યકત કર્યો હતો.

લોકડાઉનના કારણે સમગ્ર ઈંગ્લેન્ડમાં ૫ નવેમ્બરથી તમામ જીમ બંધ કરવાની ફરજ પડી છે. દેશમાં લાગુ કરવામાં આવેલા નવા લોકડાઉનના ભાગ રૂપે આ તમામ જીમ ૨ ડિસેમ્બર સુધી બંધ રહેશે. દેશમાં કોવિડ-૧૯ના કેસની સંખ્યામાં ઘટાડો થયા અને રોગચાળા પર નિયંત્રણ મેળવવાના હેતુથી લંડનમાં ફરીથી લોકડાઉન જાહેર કરવામાં આવ્યું છે.

જોકે, ઘણા લોકોનું કહેવું છે કે જીમ સ્વાસ્થ્ય માટે સારા છે અને તેથી તેને ખુલ્લા રાખવા જોઈએ. સ્પોર્ટ્સ ન્યૂટ્રિશિયન કંપની ગ્રેનાડેએ જીમ ખુલ્લા રાખવાનું સમર્થન કર્યું છે. તેણે ટેન્ક દ્વારા વિરોધ વ્યકત કર્યો હતો. આ પાછળનું કારણ જણાવતા કંપનીએ જણાવ્યું હતું કે, જીમ સીધા સ્વાસ્થ્ય સાથે સંકળાયેલા છે અને તેનાથી લોકોનું શારીરિક અને માનસિક સ્વાસ્થ્ય જળવાશે. આ વર્ષે લોકોના માનસિક સ્વાસ્થ્યની ખરી કસોટી થઈ છે.

કંપનીએ જણાવ્યું હતું કે, ફિનેટસ વ્યકિતના માનસિક સ્વાસ્થ્ય પર પણ અસર કરે છે. તેનાથી ચિંતા, તણાવ અને ડિપ્રેશન દ્યટે છે. લોકો ઠંડીની સિઝનમાં કસરત કરે તે અત્યંત જરૂરી છે. નોંધનીય છે કે લોકડાઉન દરમિયાન પણ લોકોને આઉટડોરમાં કસરત કરવાની છૂટ આપવામાં આવી છે.

બાર્કનેલના એમપી જેમ્સ સન્ડરલેન્ડે સોમવારે હાઉસ ઓફ કોમન્સમાં વડાપ્રધાન બોરિસ જહોનસનને પ્રશ્ન કર્યો હતો કે સોશિયલ ડિસ્ટન્સિંગનું પાલન કરતા ગોલ્ફ કોર્સ કે અન્ય સ્પોર્ટ્સ વેન્યુને આ લોકડાઉનમાં રાહત મળશે? તેના જવાબમાં જહોનસને કહ્યું હતું કે હું મારા માનનીય મિત્રની માફી માંગુ છું કે અમે હાઉસને અમે જેને લોકડાઉનમાંથી બાકાત રાખ્યા છે તેની લાંબી યાદી રજૂ કરી શકતો નથી.

તેમણે કહ્યું હતું કે, જો તમે એક વસ્તુને બાકાત રાખશો તો તેની અસર સમગ્ર પેકેજ પર પડશે. તેથી હું ઈચ્છું છું કે પ્રત્યેક વ્યકિત સાથે મળીને કોરોના વાયરસને નિયંત્રણમાં રાખવા માટે કામ કરે. જેથી કરીને આપણે ડિસેમ્બરમાં ફરીથી અનલોક કરી શકીએ.