Gujarati News

મહોબા,તા. ૧૧: ઉત્તર પ્રદેશના મહોબામાંથી પતિ-પત્‍ની વચ્‍ચેના પ્રેમનો એક અનોખો કિસ્‍સો સામે આવ્‍યો છે. પત્‍નીના મોત બાદ પતિ તેની સળગતી ચિતામાં કૂદી પડ્‍યો હતો. જો કે, ત્‍યાં હાજર લાકોએ પતિને પકડીને ચિતામાંથી બહાર કાઢ્‍યો હતો. સળગતી ચિતામાં ઝંપલાવ્‍યુ હોવાથી દાઝી જવાથી સામાન્‍ય ઈજાઓ પહોંચી હતી. જે બાદ તેને સારવાર માટે હોસ્‍પિટલમાં ખસેડવામાં આવ્‍યો હતો. આ દ્યટના કુલપહાડના જેતપુર ગામની છે. અહીં ડ્‍યોઢીપુરા મોહલ્લામાં રહેતા બ્રજેશની પત્‍નીએ ઘરમાં આપઘાત કરીને જીવન ટૂંકાવ્‍યું હતું. આ ઘટના બાદ તેનો પતિ બ્રજેશ ખૂબ જ દુઃખી છે.

બ્રજેશના લગ્ન ચાર વર્ષ પહેલાં અકૌનામાં રેહતા રામચરણની પુત્રી ઉમા સાથે થયા હતા. એવી ચર્ચા છે કે, પત્‍ની ઉમાએ સારવાર માટે તેના પતિ બ્રજેશ પાસે પાંચ હજાર રુપિયા માંગ્‍યા હતા. બ્રજેશે સવારમાં રુપિયાની વ્‍યવસ્‍થા કરીને આપવાનું કહ્યું હતું. આ વાતથી નારાજ પત્‍ની ઉમાએ રાત્રે ઘરે ફાંસો ખાઈને આપઘાત કરી લીધો હતો. જયારે બ્રજેશની આંખો ખુલી તો તેની પત્‍ની લટકતી હાલતમાં જોવા મળી હતી. એ પછી પરિવારના લોકો એકઠા થઈ ગયા અને ઉમાને નજીકની હોસ્‍પિટલમાં લઈ ગયા હતા. જો કે, ફરજ પરના તબીબોએ ઉમાને મૃત જાહેર કરી હતી.

ઉમાના મોત બાદ તેના પિયર પક્ષે પતિ બ્રજેશ અને તેના સાસરીના લોકો વિરૂદ્ધ દહેજ અને હત્‍યાનો આક્ષેપ કર્યો છે. પોસ્‍ટમોર્ટમ બાદ ઉમાના મૃતદેહને અંતિમ સંસ્‍કાર માટે લઈ જવામાં આવ્‍યો હતો. અહીં પતિ બ્રજેશે તેની પત્‍ની ઉમાના મૃતદેહને મુખાગ્નિ આપી હતી. એ પછી બ્રજેશ સળગતી ચિતામાં કૂદી પડ્‍યો હતો. જો કે, એ સમયે હાજર લોકોએ તેને પકડીને સળગતી ચિતામાંથી બહાર કાઢ્‍યો હતો અને જીવ બચાવી લીધો હતો. સળગતી ચિતામાં કૂદ્યો હોવાથી બ્રજેશ દાઝી ગયો હોવાથી તેને સારવાર માટે હોસ્‍પિટલ ખસેડવામાં આવ્‍યો હતો.

બ્રજેશે કહ્યું કે, એક સામાન્‍ય વાતને લઈ તેની પત્‍નીએ આપઘાત કરી લીધો. એના મોતથી હું ખૂબ જ દુઃખી છું. અમે સાત જન્‍મ સુધી સાથે જીવવા-મરવાના સમ ખાધા હતા. મારી પત્‍નીના ગયા પછી હું પણ જીવતો રહેવા માગતો નથી, એટલે હું સળગતી ચિતામાં કૂદી પડ્‍યો હતો. બ્રજેશના પિતા હરદયાલ અને માતા માલતીબેને જણાવ્‍યું કે, ઉમાના મોત બાદ બ્રજેશ પણ તેની ચિતામાં સળગીને મરી જવા માગતો હતો. એટલા માટે તે સળગતી ચિતામાં કૂદી પડ્‍યો હતો.