Gujarati News

નવી દિલ્‍હી તા. ૧૧ : જવાહરલાલ નેહરુ યુનિવર્સિટીમાં રવિવારે મોડી સાંજે ડાબેરી અને જમણેરી વિદ્યાર્થીઓ વચ્‍ચે ફરી એકવાર અથડામણ થઈ હતી. કહેવામાં આવી રહ્યું છે કે આ હિંસક અથડામણમાં કેટલાક વિદ્યાર્થીઓ ઘાયલ થયા છે. જેએનયુ સ્‍ટુડન્‍ટ્‍સ યુનિયનના પ્રમુખ આઈશી ઘોષના જણાવ્‍યા અનુસાર, જેએનયુમાં હિંસક અથડામણ થઈ હતી, જેમાં કેટલાક વિદ્યાર્થીઓ ઘાયલ થયા હતા. બીજી તરફ હંગામા બાદ અખિલ ભારતીય વિદ્યાર્થી પરિષદના સમર્થકો સૂત્રોચ્‍ચાર કરતા JNUના મુખ્‍ય ગેટ પર પહોંચી ગયા હતા ત્‍યારબાદ મુખ્‍ય ગેટ બંધ કરી દેવામાં આવ્‍યો હતો. દક્ષિણ પશ્ચિમ દિલ્‍હી પોલીસના ડીસીપીનું કહેવું છે કે હાલમાં સ્‍થિતિ શાંતિપૂર્ણ છે, બંને વિદ્યાર્થી પક્ષો શાંતિપૂર્ણ રીતે વિરોધ કરી રહ્યા છે. ફરિયાદ મળતાં યોગ્‍ય કાયદેસરની કાર્યવાહી કરવામાં આવશે
અગાઉ પણ સાંજે અખિલ ભારતીય વિદ્યાર્થી પરિષદ (એબીવીપી) અને ડાબેરી વિદ્યાર્થીઓ એકબીજા સાથે અથડાયા હતા. ડાબેરી પાંખના વિદ્યાર્થીઓનો આરોપ છે કે અખિલ ભારતીય વિદ્યાર્થી પરિષદ (ABVP)ના વિદ્યાર્થીઓએ રવિવારે સાંજે JNU કેમ્‍પસમાં થયેલી અથડામણમાં તેમને માંસાહારી ખોરાક ખાવાથી રોક્‍યા હતા. ડાબેરી વિદ્યાર્થીઓએ એવો પણ આક્ષેપ કર્યો હતો કે એબીવીપીના વિદ્યાર્થીઓએ કાવેરી હોસ્‍ટેલના મેસ સેક્રેટરી પર હુમલો કર્યો હતો.
એબીવીપીના વિદ્યાર્થીઓ સામે જેએનયુ કેમ્‍પસમાં ગુંડાગીરીનો આક્ષેપ કરતા ડાબેરી વિદ્યાર્થીઓએ વિદ્યાર્થીઓને એક થવા હાકલ કરી હતી. બીજી તરફ એબીવીપીનો આરોપ છે કે ડાબેરી વિદ્યાર્થીઓ કાવેરી હોસ્‍ટેલમાં રામનવમીની પૂજા કરવા દેતા નથી.
તે જ સમયે, અખિલ ભારતીય વિદ્યાર્થી પરિષદ (એબીવીપી) ના મહાસચિવ નિધિ ત્રિપાઠીએ એક ટ્‍વિટ કર્યું. તેમણે લખ્‍યું કે જેએનયુ કાવેરી હોસ્‍ટેલમાં મેસની અંદર ઈફતાર પાર્ટી થઈ રહી છે અને બીજી બાજુ બહાર રામ જન્‍મોત્‍સવ પર હવન, પરંતુ સમાજને તોડનારા ડાબેરીઓથી આ હંમેશા જોવા મળતું નથી અને હંમેશની જેમ આજે પણ જુઠ્ઠાણાનો આશરો લઈ રહ્યા છે. રામ કામમાં અવરોધો ઉભી કરી રહ્યા છે.
બીજી તરફ આ ફૂડ વિવાદ પર યુનિવર્સિટી દ્વારા નોટિસ જારી કરવામાં આવી છે. યુનિવર્સિટી તરફથી કહેવામાં આવ્‍યું છે કે જેએનયુ કેમ્‍પસની મેસમાં કોઈપણ ધર્મના ખાવા-પીવા પર કોઈ પ્રતિબંધ નથી. યુનિવર્સિટી વહીવટીતંત્ર તરફથી કોઈ પ્રતિબંધ નથી. રમઝાન હોય કે રામ નવમી... દરેક જણ તેની પોતાની રીતે ઉજવણી કરી શકે છે. સાથે જ એવું પણ કહેવામાં આવ્‍યું છે કે કોઈના પહેરવેશ, ભોજન અને આસ્‍થા પર કોઈ રોકી શકે નહીં. બધા લોકો પોતપોતાની રીતે ધર્મનું પાલન કરે છે. મેસ વિદ્યાર્થી સમિતિ દ્વારા ચલાવવામાં આવે છે અને મેનુ તેમના દ્વારા નક્કી કરવામાં આવે છે.
હાલ તો એ કાર્યવાહી કરવામાં આવી છે કે વોર્ડને નોટિસ જારી કરીને સ્‍પષ્ટ કર્યું છે કે દરેક વ્‍યક્‍તિ પોતાની આસ્‍થા પ્રમાણે પૂજા કરી શકે છે, પોતાના ધર્મનું પાલન કરી શકે છે, યુનિવર્સિટી તરફથી કોઈ પ્રતિબંધ નથી.
JNU વિદ્યાર્થી સંઘે કહ્યું છે કે ABVPના ગુંડાઓએ તેમની નફરત અને વિભાજનકારી એજન્‍ડાની રાજનીતિને કારણે કાવેરી હોસ્‍ટેલમાં હિંસક વાતાવરણ સજર્યું છે. તેઓ મેસ કમિટીને ડિનર મેનુ બદલવા માટે દબાણ કરી રહ્યા છે અને મેસ સાથે સંકળાયેલા લોકો સાથે ડાબેરી વિદ્યાર્થીઓ પર હુમલો કરી રહ્યા છે. મેનુમાં શાકાહારી અને માંસાહારી બંને પ્રકારના ખોરાક છે. વિદ્યાર્થીઓ તેમની પસંદગીનો કોઈપણ ખોરાક લઈ શકે છે. પરંતુ એબીવીપીના કાર્યકરોએ ગુંડાગીરી કરીને હોબાળો મચાવ્‍યો હતો. આ સાથે મેસના કર્મચારીઓને પણ માર મારવામાં આવ્‍યો હતો. એબીવીપીના કાર્યકરોએ મેસના કર્મચારીઓ પર નોન-વેજ ફૂડ ન બનાવવાનું દબાણ કર્યું હતું.
વિદ્યાર્થી સંઘ દ્વારા કહેવામાં આવ્‍યું છે કે જેએનયુ અને તેની હોસ્‍ટેલ બધા માટે સમાન છે. અહીં રહેતા વિદ્યાર્થીઓ અલગ-અલગ વિસ્‍તારના છે અને તેમની સંસ્‍કૃતિ, ખાણી-પીણી પણ અલગ છે, જેનું સન્‍માન કરવું જોઈએ. એવો આક્ષેપ કરવામાં આવ્‍યો હતો કે ABVPનું આ પગલું JNU જેવા લોકતાંત્રિક અને બિનસાંપ્રદાયિક સ્‍થળોએ તેમના વર્ચસ્‍વની રાજનીતિ અને જમણેરી હિન્‍દુત્‍વની નીતિઓને પ્રતિબિંબિત કરે છે.
વિદ્યાર્થી સંઘે કહ્યું કે જેએનયુના વિદ્યાર્થીઓ આવી વિભાજનકારી હરકતો સામે ઝૂકશે નહીં અને આવી ઘટનાઓ સામે લડત ચાલુ રાખશે. JNU વિદ્યાર્થી સંઘે વિદ્યાર્થીઓને સાંપ્રદાયિક શક્‍તિઓ સામે એક થવાની અપીલ કરી છે. આવી કોઈપણ વિભાજનકારી શક્‍તિઓ સામે મજબૂતીથી લડવું જોઈએ અને JNU સમુદાયે એકતાપૂર્વક પુનરોચ્‍ચાર કરવો જોઈએ કે આવા કોઈપણ કૃત્‍ય સામે શૂન્‍ય સહનશીલતા રહેશે.