Gujarati News

નવી દિલ્‍હી, તા.૧૨: ઉત્તર ભારતમાં તીવ્ર ઠંડી યથાવત છે. જો કે, ગુરુવારે દિલ્‍હી-એનસીઆરમાં સૂર્યપ્રકાશ હતો, પરંતુ હવામાન નિષ્‍ણાતો કહે છે કે ઉત્તર ભારતના લોકો હજી ઠંડીની ટોચમાંથી પસાર થયા નથી. ભારતીય હવામાન વિભાગ (IMD) એ મંગળવારે જણાવ્‍યું હતું કે દિલ્‍હીમાં છેલ્લા ૨૩ વર્ષમાં ત્રીજી સૌથી ખરાબ કોલ્‍ડવેવનો સામનો કરવો પડ્‍યો છે. હવે હવામાન નિષ્‍ણાતે આગાહી કરી છે કે મેદાની વિસ્‍તારોમાં તાપમાન આવતા સપ્તાહે ઘટીને -૪ ડિગ્રી સેલ્‍સિયસ થઈ શકે છે.

લાઈવ વેધર ઓફ ઈન્‍ડિયાના સ્‍થાપક નવદીપ દહિયાએ ટ્‍વીટ કર્યું કે ઉત્તર ભારતમાં ૧૪ થી ૧૯ જાન્‍યુઆરી વચ્‍ચે તીવ્ર ઠંડી પડી શકે છે અને તે ૧૬ અને ૧૮ જાન્‍યુઆરીની વચ્‍ચે તેની ટોચ પર હોવાની શકયતા છે. જ્‍યાં રાષ્‍ટ્રીય રાજધાનીમાં હળવો વરસાદ થોડા દિવસો માટે બર્ફીલા તાપમાનમાંથી થોડી રાહત આપી શકે છે. તે જ સમયે, IMDએ કહ્યું છે કે શનિવારથી દિલ્‍હી અને તેના પડોશી રાજ્‍યોમાં કોલ્‍ડવેવની સ્‍થિતિની સંભાવના છે.

હવામાન વિભાગે ચેતવણી આપી છે કે ત્રણ દિવસ પછી હવામાનમાં થોડો ફેરફાર થઈ શકે છે. ધુમ્‍મસ મહત્‍વપૂર્ણ ભૂમિકા ભજવી શકે છે. તેઓએ ‘ઠંડી સવાર' અથવા ‘કોલ્‍ડબ્‍લાસ્‍ટ' દિવસોની ચેતવણી આપી હતી જેમાં મહત્તમ તાપમાન ૧૦ ડિગ્રી સેલ્‍સિયસથી નીચે આવે છે. નવદીપ દહિયાએ કહ્યું કે મેં મારી કારકિર્દીમાં અત્‍યાર સુધી આગાહીના મોડલમાં આટલું ઓછું તાપમાન કયારેય જોયું નથી. મેદાનોમાં તાપમાન -૪ ડિગ્રીથી ૨ ડિગ્રી વાહ!

અહીં IMDએ કહ્યું છે કે આ અઠવાડિયે દિલ્‍હીમાં હળવો વરસાદ પડી શકે છે. છેલ્લાં કેટલાંક અઠવાડિયાંમાં હાડકાંને ઠંડક આપતી રાતો પછી, IMD એ પણ આ અઠવાડિયે ઉત્તરપશ્‍ચિમ ભારતના રહેવાસીઓ માટે તીવ્ર ઠંડીમાંથી માત્ર અસ્‍થાયી રાહતની આગાહી કરી હતી.