Gujarati News

શહડોલ, તા.૧૬: મધ્‍યપ્રદેશના શહડોલ જિલ્લામાં માનવતાને શરમાવે તેવો કિસ્‍સો સામે આવ્‍યો છે. શુક્રવારે અહીં એક ૯૦ વર્ષીય મહિલા પર બળાત્‍કાર થયો હતો. મહિલા જબલપુરથી શહડોલમાં તેમના સંબંધીના ઘરે આવી હતી. ૯૦ વર્ષીય મહિલાને લિફ્‌ટ આપવાના બહાને જંગલમાં લઈ જઈ બળાત્‍કાર ગુજારવામાં આવ્‍યો હતો. મહિલાના પરિજનોએ કોતવાલી પોલીસમાં કેસ નોંધાવ્‍યો છે. અધિક પોલીસ અધિક્ષક મુકેશ વૈશે જણાવ્‍યું કે પરિવારના સભ્‍યોની ફરિયાદ પર કેસ નોંધવામાં આવ્‍યો છે. આરોપીની શોધખોળ ચાલુ છે. ટૂંક સમયમાં તેની ધરપકડ કરવામાં આવશે. તેમણે જણાવ્‍યું કે ૯૦ વર્ષીય મહિલા ગુરુવારે રાત્રે જબલપુરથી શહડોલ ટ્રેનમાં આવ્‍યા હતા.

ટ્રેન રાત્રે શહડોલ પહોંચી હતી જેના કારણે મહિલા રાત્રે રેલવે સ્‍ટેશન પર જ રોકાયા હતા. સવારે મહિલા ઓટોમાં બંધવાવરા ગામ જવા નીકળ્‍યા હતા. પરંતુ ઓટો ચાલકે તેમને અંતરા પાસે એમ કહીને ઉતારી દીધા કે તે આગળ જઈ શકશે નહીં. મહિલા ત્‍યાંથી નીચે ઉતરીને બસની રાહ જોવા લાગ્‍યા. તે દરમિયાન ત્‍યાંથી એક અજાણ્‍યો વ્‍યક્‍તિ બાઇક પર આવ્‍યો અને મહિલાને ઘર છોડી જવાનું કહીને પોતાની સાથે લઈ ગયો.

એક અજાણ્‍યા વ્‍યક્‍તિએ મહિલાને જંગલમાં લઈ જઈને તેમના પર બળાત્‍કાર ગુજાર્યો હતો અને પછી તેમને રસ્‍તા પર છોડીને ત્‍યાંથી ભાગી ગયો હતો. કોઈક રીતે સડક માર્ગે રહેણાંક વિસ્‍તારમાં પહોંચેલા મહિલાએ લોકોને પોતાની આપવીતિ સંભળાવી. જે બાદ લોકોએ મહિલાના પરિવારજનોને સમગ્ર મામલાની જાણ કરી હતી.

બનાવની જાણ થતાં પરિવારજનો ઘટનાસ્‍થળે પહોંચ્‍યા હતા અને ત્‍યાંથી સીધા જ પોલીસ સ્‍ટેશન ગયા હતા મહિલા સાથે રેપ થયાની ફરિયાદ નોંધાવી હતી. પોલીસે ફરિયાદના આધારે અજાણ્‍યા શખ્‍સો સામે ગુનો નોંધી આરોપીની શોધખોળ શરૂ કરી છે. તે જ સમયે, મહિલાને સારવાર માટે જિલ્લા હોસ્‍પિટલમાં દાખલ કરવામાં આવ્‍યા હતા. પરંતુ ગંભીર હાલતને કારણે તેમને મેડિકલ કોલેજમાં રીફર કરવામાં આવ્‍યા છે. સમગ્ર મામલે પોલીસ તપાસ ચાલી રહી છે.

આ મામલામાં દિલ્‍હી મહિલા આયોગના અધ્‍યક્ષ સ્‍વાતિ માલીવાલે ટ્‍વિટ કરીને આરોપી સામે કડક કાર્યવાહીની માંગ કરી છે. તેમણે ટ્‍વીટ કરીને કહ્યું- મધ્‍યપ્રદેશના શહડોલ જિલ્લામાં ૯૨ વર્ષની મહિલા સાથે ક્રૂરતાપૂર્વક બળાત્‍કાર કરવામાં આવ્‍યો. આ વ્‍યક્‍તિ મહિલાને જંગલમાં લઈ ગયો અને તેમની સાથે બળાત્‍કાર કર્યો. અત્‍યાર સુધી તે પહોંચની બહાર છે. આ બાબત માનવતા માટે શરમજનક છે. શિવરાજ સિંહ ચૌહાણને અપીલ છે કે તેની તાત્‍કાલિક ધરપકડ કરવામાં આવે અને કડક સજા મળે.