Gujarati News

જો તમે કાશ્‍મીર જવાની યોજના બનાવી રહ્યા છો તો તમારા માટે આ સારો સમય છે. આ દિવસોમાં શ્રીનગરના રૈનાવારી વિસ્‍તારમાં સ્‍થિત બદામવારી બાગ મોસમ-એ-બહારના આગમન પર રંગીન નજારો રજૂ કરી રહ્યો છે અને ટુલિપ ફેસ્‍ટિવલ પણ ટૂંક સમયમાં શરૂ થવા જઈ રહ્યો છે. એશિયાનો સૌથી મોટો ટ્‍યૂલિપ ગાર્ડન મધ્‍ય કાશ્‍મીરના શ્રીનગરમાં વિશ્વ પ્રસિદ્ધ દાલ તળાવના કિનારે આવેલું છે. બગીચામાં રંગબેરંગી ફૂલો ખીલવા લાગ્‍યા છે. ૧૯ માર્ચથી તેને સામાન્‍ય લોકો માટે ખોલવામાં આવશે. આ વર્ષે ૬૮ જાતોના ૧૫ લાખથી વધુ ટ્‍યૂલિપ બલ્‍બનું વાવેતર કરવામાં આવ્‍યું છે. આ ઉપરાંત અન્‍ય ફૂલોની પણ અનેક જાતનું વાવેતર કરવામાં આવ્‍યું છે. ડિરેક્‍ટરે કહ્યું કે અહીં આવનારા લોકો માટે તમામ સુવિધાઓનું ધ્‍યાન રાખવામાં આવ્‍યું છે. અહીં વરસાદી આશ્રયસ્‍થાનો પણ પૂરતા છે, જેથી જયારે હવામાન ખરાબ હોય ત્‍યારે લોકો વરસાદથી બચી શકે. આ માહિતી ફલોરીકલ્‍ચર વિભાગના ડાયરેક્‍ટર ફારૂક અહમદ રાથેરે આપી છે. બગીચામાં ગાર્ડનિંગ, પોષક તત્‍વોનો છંટકાવ અને સમારકામની કામગીરી પૂરજોશમાં ચાલી રહી છે. ગયા વર્ષે અહીં રેકોર્ડ ૩.૬૦ લાખ પ્રવાસીઓ આવ્‍યા હતા. આ વર્ષે વધુ પ્રવાસીઓ આવવાની આશા છે. શ્રીનગરમાં પ્રસિદ્ધ દાલ સરોવરના કિનારે જબરવાન હિલ્‍સની તળેટીમાં આવેલું ટ્‍યૂલિપ ગાર્ડન લગભગ ૫૨ હેક્‍ટર વિસ્‍તારમાં ફેલાયેલું છે. તે ૨૦૦૭ માં ખોલવામાં આવ્‍યું હતું. ગયા વર્ષે ઓપન એર કાફેટેરિયાની સ્‍થાપના કરવામાં આવી છે. શ્રીનગર મ્‍યુનિસિપલ કોર્પોરેશન અને ફલોરીકલ્‍ચર વિભાગે આશા વ્‍યક્‍ત કરી છે કે આ વર્ષે પણ લાખો પ્રવાસીઓ તેમને જોવા માટે આવશે અને અગાઉના રેકોર્ડ તૂટી જશે. ટ્‍યૂલિપ ગાર્ડનની મુલાકાત લેવાનો સમય સામાન્‍ય રીતે દરરોજ સવારે ૯ થી સાંજે ૭ વાગ્‍યા સુધીનો હોય છે અને તે માર્ચના મધ્‍યથી એપ્રિલના અંત સુધી લોકો માટે ખુલ્લો રહે છે. જો કે, હવામાન અને પ્રવાસીઓના ધસારાને કારણે ખુલવાનો અને બંધ થવાનો સમય બદલાઈ શકે છે.