Gujarati News

નવી દિલ્‍હી તા. ૧૭ : બે દિવસીય SCO સમિટ ૨૦૨૨ સમાપ્ત થઈ ગઈ છે અને હવે ભારત આવતા વર્ષે આ આઠ દેશોના પ્રાદેશિક સંગઠનની યજમાની કરશે. ઉઝબેકના રાષ્ટ્રપતિ શવકત મિરિઝિઓયેવે સમરકંદમાં ૨૨મસ SCO સમિટની અધ્‍યક્ષતા કરી હતી, જેમાં નરેન્‍દ્રભાઇ મોદીએ પણ ભાગ લીધો હતો. SCO દેશોએ ઘણા મુદ્દાઓ પર ચર્ચા કરી અને દરેકે પોતાના વિચારો અને સૂચનો આપ્‍યા. આ દરમિયાન વડાપ્રધાન મોદીએ વિશ્વને શાંતિનો સંદેશ આપ્‍યો હતો.
SCO સમિટ ૨૦૨૨ના સમાપન બાદ હવે આ પ્રાદેશિક સંગઠનની જવાબદારી આવતા વર્ષે ભારતના હાથમાં આવી ગઈ છે. ૨૦૨૩ સંમેલન માટે, ઉઝબેકના રાષ્ટ્રપતિએ તેનું ફરતું પ્રમુખપદ ભારતને સોંપ્‍યું છે.
નરેન્‍દ્રભાઇએ રશિયાના રાષ્ટ્રપતિ વ્‍લાદિમીર પુતિન સાથેની મુલાકાતમાં કહ્યું કે આ સમયગાળો યુદ્ધનો સમયગાળો નથી. રશિયા છેલ્લા ૯ મહિનાથી યુક્રેનમાં યુદ્ધ ચલાવી રહ્યું છે. પુતિનને સલાહ આપતા વડાપ્રધાન મોદીએ કહ્યું કે, મહામહિમ, હું સમજું છું કે આજે યુદ્ધનો સમય નથી. આ અંગે રાષ્ટ્રપતિ પુતિને કહ્યું કે ‘હું તમારી સ્‍થિતિ, યુક્રેનમાં સંઘર્ષ પર તમારી ચિંતાઓને સમજું છું. અમે શક્‍ય તેટલી વહેલી તકે તેને સમાપ્ત કરવા માટે અમારા શ્રેષ્ઠ પ્રયાસો કરીશું.'