Gujarati News

નવી દિલ્હી, તા.૧૯ : ફૂડ ડિલિવરી એપ ઝોમેટોની સોશિયલ મીડિયા ટીમ અત્યારે મુશ્કેલીમાં મુકાઈ છે. કંપનીના એક કર્મચારીની ગ્રાહક સાથેની વાતચીતનો સ્ક્રીનશોટ સોશિયલ મીડિયા પર અને ખાસકરીને ટ્વિટર પર વાયરલ થઈ રહ્યો છે. તમિલનાડુમાં રહેતા એક વ્યક્તિએ આરોપ મૂક્યો છે કે, ઝોમેટોના કર્મચારીએ તેમને હિન્દી શીખવાની સલાહ આપી હતી.

સ્ક્રીનશોટ્સ શેર કરીને વિકાસ નામના ગ્રાહકે લખ્યું છે કે, કસ્ટમર કેરનું કહેવું છે કે મને રિફંડ એટલા માટે નથી આપવામાં આવ્યું કારણકે મને હિન્દી ભાષા નથી આવડતી. તેમણે મને જૂઠો પણ કહ્યો. આરોપ છે કે ઝોમેટો કર્મચારીએ કહ્યું કે, હિન્દી રાષ્ટ્રભાષા છે છે અને દરેકને થોડી થોડી આવડવી જોઈએ.

ત્યારપછી અનેક લોકોએ ઝોમેટોને ચેટ પર પ્રશ્ન કર્યો કે શું ખરેખર હિન્દી રાષ્ટ્રભાષા છે? ઉલ્લેખનીય છે કે દક્ષિણ ભારતના રાજ્યોમાં પહેલાથી જ હિન્દીને થોપવા બદલ વિરોધ થતો આવ્યો છે. દક્ષિણ ભારતના રાજ્યો દિલ્હીને રાષ્ટ્રીય ભાષા તરીકે સ્વીકારવા તૈયાર નથી. આ પરિસ્થિતિમાં જ્યારે ઝોમેટોની આ ટિપ્પણીને કારણે સોશિયલ મીડિયા પર લોકો એપ પ્રત્યે રોષ ઠાલવી રહ્યા છે.

દક્ષિણ ભારતના લોકો એપ અનઈન્સ્ટોલ કરી રહ્યા છે અને ઝોમેટોને માંગ કરી રહ્યા છે કે, તેમણે આ બાબતે ચોખવટ કરીને પોતાનો પક્ષ સ્પષ્ટ કરવો જોઈએ. ટ્વિટર પર #Reject_Zomato ટ્રેન્ડની શરુઆત વિકાસ નામના એક ટ્વિટર યુઝરે કરી હતી. આ યુઝરના જણાવ્યા અનુસાર, તેમણે જે ઓર્ડર કર્યો હતો તેમાં એક વસ્તુ નહોતી.

તેણે આ બાબતે એપ પર કસ્ટમર કેર સાથે વાતચીત શરુ કરી હતી. કસ્ટમરે માંગ કરી કે જે વસ્તુ નથી મળી તેના પૈસા પાછા મળવા જોઈએ. સ્ક્રીનશોટ્સ અનુસાર, કસ્ટમર કેરના કર્મચારીએ ગ્રાહકને કહ્યું કે હોટલનો સ્ટાફ તેમની ભાષા સમજી નથી શકતો. જેના જવાબમાં વિકાસે કહ્યું કે, આ મારો ચિંતાનો વિષય નથી.

જો ઝોમેટો તમિલનાડુમાં ઉપલબ્ધ છે તો તેમણે એવા લોકોને રાખવા જોઈએ જે ભાષા સમજતા હોય. ગ્રાહકની આ દલીલના જવાબમાં ઝોમેટો તરફથી કહેવામાં આવ્યું કે, હિન્દી આપણી રાષ્ટ્રભાષા છે અને તે ઘણી કોમન છે. દરેક વ્યક્તિને થોડી તો આવડવી જ જોઈએ. વિકાસે આ ફરિયાદ ટ્વિટર પર કરી તો ઝોમેટોએ તેમનો નંબર માંગ્યો.

વિકાસે લખ્યું છે કે, મને એક સ્પષ્ટ ખુલાસો જોઈએ અને સાર્વજનિક માફી પણ જોઈએ. કંપનીના કસ્ટમર કેર તરફથી જવાબમાં કહેવામાં આવ્યું કે, ફોન પર વાતચીત પછી વિકાસ સંતુષ્ટ છે. પરંતુ ત્યારસુધી વિકાસની ટ્વિટ વાયરલ થઈ ગઈ હતી. લોકોએ મોટી સંખ્યામાં આ સ્ક્રીનશોટ્સ શેર કર્યા. ખાસકરીને તમિલનાડુના લોકો ઝોમેટો પર રોષે ભરાયા છે. ઉલ્લેખનીય છે કે આ પહેલીવાર નથી કે ઝોમેટોએ સોશિયલ મીડિયા પર લોકોના ગુસ્સાનો સામનો કરવો પડ્યો હોય.

થોડા સમય પહેલા એક ગ્રાહકે હિન્દુ ધર્મના ડિલિવરી બોયની માંગ કરી હતી. ઝોમેટોએ ટ્વિટના જવાબમાં કહ્યુ હતું કે, ખોરાકનો કોઈ ધર્મ નથી હોતો, તે પોતે એક ધર્મ છે. ત્યારપછી ઘણાં લોકોએ ઝોમેટોના વખાણ કર્યા હતા અને એક વર્ગ એવો પણ હતો જેણે તે સમયે પણ ઝોમેટોને બોયકોટ કરવાનું અભિયાન શરુ કર્યુ હતું.