અદાણીની વધુ એક સિધ્‍ધી : વોરેન બફેટને પાછળ રાખી દીધા : માર્ક ઝુકરબર્ગ ૧૭માં સ્‍થાને ફેંકાયા

News of Monday, 25th April 2022

અદાણીની વધુ એક સિધ્‍ધી : વોરેન બફેટને પાછળ રાખી દીધા : માર્ક ઝુકરબર્ગ ૧૭માં સ્‍થાને ફેંકાયા

ગૌતમ અદાણી હવે વિશ્વના નંબર પાંચ ધનપતિ : અંબાણી ૯માંથી ૮માં સ્‍થાને પહોંચ્‍યા

નવી દિલ્‍હી તા. ૨૫ : અદાણી ગ્રૂપના ચેરમેન ગૌતમ અદાણી હવે નેટવર્થની દૃષ્ટિએ વિશ્વના અબજોપતિઓની યાદીમાં ૫માં સ્‍થાને પહોંચી ગયા છે. તેણે ઈન્‍વેસ્‍ટમેન્‍ટ ગુરુ વોરેન બફેટને હરાવીને આ સ્‍થાન હાંસલ કર્યું છે. ફોર્બ્‍સના રિયલ ટાઈમ બિલિયોનેર્સ ઈન્‍ડેક્‍સના તાજેતરના રેન્‍કિંગ અનુસાર અદાણી $૧૨૩.૨ બિલિયનની નેટવર્થ સાથે ૫માં ક્રમે છે અને વોરેન બફેટ $૧૨૧.૭ બિલિયનની નેટવર્થ સાથે ૬ઠ્ઠા સ્‍થાને છે. તે જ સમયે, રિલાયન્‍સ ઇન્‍ડસ્‍ટ્રીઝના ચેરમેન મુકેશ અંબાણી $૧૦૪.૨ બિલિયનની નેટવર્થ સાથે ૯માંથી ૮મા સ્‍થાને આવી ગયા છે. તે જ સમયે, બ્‍લૂમબર્ગ બિલિયોનેર્સની યાદીમાં, અદાણી $૧૧૯ બિલિયન સાથે છઠ્ઠા સ્‍થાને છે અને અંબાણી $૧૦૨ બિલિયન સાથે ૯મા સ્‍થાને છે. આ વર્ષે અત્‍યાર સુધીમાં અંબાણી-અદાણીની સંપત્તિમાં કુલ $૫૫.૨ બિલિયનનો વધારો થયો છે. તે જ સમયે, એલોન મસ્‍કને $૧૧.૫ બિલિયનનું નુકસાન થયું છે, તેમ છતાં તે પ્રથમ સ્‍થાને છે. ફેસબુકના સીઈઓ માર્ક ઝકરબર્ગ, જે એક સમયે ટોપ-૧૦ અબજોપતિઓમાંના એક હતા, તેમને આ વર્ષે $૫૭.૩ બિલિયનનું સૌથી વધુ નુકસાન થયું છે. તે હવે $૬૮.૨ બિલિયનની નેટવર્થ સાથે ૧૭મા ક્રમે છે.