Gujarati News

લંડન તા. ૨૬ : આવતા મહિને લંડનમાં હ્યુમન ચેલેન્જ ટ્રાયલ થવાની છે. લંડનની રોયલ ફ્રી હોસ્પિટલમાં યોજાનારી આ ટ્રાયલમાં લગભગ ૨૫૦૦ બ્રિટીશ લોકો જાણી જોઈને કોરોના પોઝિટિવ બનશે. જે બાદ આ લોકો પર રસીનું પરીક્ષણ કરવામાં આવશે. આ ટ્રાયલમાં તંદુરસ્ત લોકોને પહેલા કોરોના વાયરસ પોઝિટિવ કરવામાં આવશે અને ત્યારબાદ તેમને રસી આપવામાં આવશે અને આ રસી કાર્યરત છે કે કેમ તે શોધવા માટે તેના પરિણામો પર નજર રાખવામાં આવશે. અગાઉ પણ મેલેરિયા, ટાઇફોઇડ અને ફલૂ જેવા રોગો માટે આવા પ્રયોગો કરવામાં આવ્યા છે.

આ પરીક્ષણો હાથ ધરવામાં આવી રહ્યા છે જેથી કોરોના રસીનું કામ ઝડપી થઈ શકે. આ બધા લોકોની ઉંમર ૧૮ થી ૩૦ વર્ષની વચ્ચે હશે. આ વયના લોકોમાં કોરોનાથી મૃત્યુનું જોખમ સૌથી ઓછું છે. તેઓને રોયલ ફ્રી હોસ્પિટલના સ્પેશિયાલિસ્ટ કિલનિકમાં એડમિટ કરવામાં આવશે અને તેમના લક્ષણોની નિરીક્ષણ અહીં કરવામાં આવશે. બે થી ત્રણ અઠવાડિયાના આ પ્રયોગ માટે આ લોકોને ૪૦૦૦ પાઉન્ડ મળશે, જે ભારતીય ચલણમાં આશરે ૪ લાખ રૂપિયા થશે.

૧૮ વર્ષનો એલાસ્ટર ફ્રેઝર પણ આ ટ્રાયલ્સનો એક ભાગ છે. તેમણે વાતચીતમાં જણાવ્યું હતું કે ઓછામાં ઓછા બે અઠવાડિયા સુધી તેમને કિલનિકમાં બંધ રાખવામાં આવશે અને તેમના શરીર પર નજર રાખવામાં આવશે. તેમણે કહ્યું કે જો આ ટ્રાયલ સફળ રહી તો તે લાખો લોકોના જીવ બચાવી શકશે, તેથી તેઓ આ ટ્રાયલનો ભાગ બનવા માટે તૈયાર છે.

આ સિવાય ૨૯ વર્ષીય જેનિફર રાઈટ પણ આ ટ્રાયલ્સનો એક ભાગ છે. તેમણે કહ્યું કે મારા કેટલાક મિત્રો છે જે તબીબી ક્ષેત્રે કામ કરે છે અને તેઓ આ રોગચાળાના સમયમાં તમામ પ્રકારના જોખમો લઈને અને તેમના જીવન પર રમીને લોકોને બચાવી રહ્યા છે. તે જ સમયે, આપણામાંના ઘણા એવા છે જે ઘરે સુરક્ષિત છે. આવી સ્થિતિમાં, જયારે મને આવી તક મળી તો હું ઇનકાર કરી શકી નહીં, કારણ કે હું આ વાયરસમાંથી વહેલી તકે રસી આવે તેની રાહ જોઈ રહી છું

ટ્રાયલની શરૂઆત ૧૮મી સદીમાં વૈજ્ઞાનિક એડવર્ડ જેનર દ્વારા કરવામાં આવી હતી જયારે તેમના ગાર્ડનમાં કામ કરતા પુત્રને વાયરસનો ચેપ લાગ્યો હતો ત્યારે તેની રસી અસરકારક છે કે કેમ તે શોધવા માટે આવી પરીક્ષણો શરૂ કરવામાં આવી હતી. ત્યારથી આ પ્રકારના જીવલેણ રોગો માટે આ પ્રયોગ ખૂબ જ અસરકારક સાબિત થયો છે.