Gujarati News

નવી દિલ્હી તા. ૨૬ : હાલના સમયમાં મોબાઇલ દરેક વ્યકિતના જીવનનો એક મહત્વપૂર્ણ ભાગ બની ગયો છે. સસ્તા મોબાઈલ કોલ્સ અને ડેટાને લીધે લોકો કલાકો સુધી મોબાઈલ કોલિંગ કરે છે અને વોટ્સએપ, ટ્વિટર જેવી એપ્સનો ઉપયોગ કરે છે. પરંતુ નવા વર્ષથી મોબાઇલ કોલિંગ સાથે વોટ્સએપ અને ટ્વિટરમાં મોટા ફેરફારો થવાના છે, જેના કારણે ઘણા યૂઝરોને નવા વર્ષથી વોટ્સએપ અને ટ્વિટરનો ઉપયોગ કરવામાં મુશ્કેલી આવી શકે છે.

૧ જાન્યુઆરીથી તમારા જૂના મોબાઇલ ફોનમાં વોટ્સએપ બંધ થઈ શકે છે. આ સાથે જો આઇફોન એટલે કે આઇફોન 4s, આઇફોન 5s, આઇફોન ૫ સી, આઇફોન ૬, આઇફોન 6s ના વર્ઝનમાં જે સોફટવેર છે તે અપડેટ થઈ શકે છે. આ રીતે અપડેટ કર્યા પછી, આ આઇફોન મોડેલોમાં વોટ્સએપ ચલાવી શકાય છે.

એન્ડ્રોઇડ સ્માર્ટફોનની વાત કરીએ તો, એન્ડ્રોઇડ ૪.૦.૩ પર ચાલતા સ્માર્ટફોન પર વોટ્સએપને સપોર્ટ કરવામાં આવશે નહીં.

આવતા વર્ષે ૧૫ જાન્યુઆરીથી મોબાઇલ કોલિંગની દુનિયામાં મોટો પરિવર્તન આવશે. ૧૫ જાન્યુઆરી ૨૦૨૧ થી, ફિકસ્ડ ફોન એટલે કે લેન્ડલાઇનથી મોબાઇલ પર કોલ કરવા માટે મોબાઇલ નંબર પહેલાં '૦' મૂકવું ફરજિયાત રહેશે. નવી સિસ્ટમનો અમલ કરવા માટે ટેલિકોમ વિભાગે કંપનીઓને ૧ જાન્યુઆરી સુધીમાં જરૂરી વ્યવસ્થા કરવા નિર્દેશ આપ્યો છે. ટેલિકોમ રેગ્યુલેટરી ઓથોરિટી (ટ્રાઇ) દ્વારા લેન્ડલાઇનથી મોબાઇલ પર કોલ કરવા માટે ૦ લાદવાની દરખાસ્ત જાહેર કરવામાં આવી હતી.

ટ્વિટરે ૨૦ જાન્યુઆરીથી એકાઉન્ટ વેરિફિકેશનની પ્રક્રિયા ફરીથી શરૂ કરવાની જાહેરાત કરી છે. હવે સામાન્ય જાહેર ખાતાને બ્લુ વેરિફાઇડ ટિક ફરીથી મેળવી શકશે. ટ્વિટર યૂઝરે નવી નીતિ રજૂ થયા પછી ૨૦ જાન્યુઆરીથી ટ્વિટરનો ઉપયોગ કરતી વખતે સાવચેત રહેવું જોઈએ, કારણ કે ટ્વિટરે તેના બ્લોગમાં કહ્યું છે કે જે એકાઉન્ટ્સ સક્રિય નથી અથવા તેમની વિગતો અપૂર્ણ છે તેવા એકાઉન્ટ્સમાંથી વેરિફિકેશન બેઝ દૂર કરવામાં આવશે. ટ્વિટરની નવી નીતિ હેઠળ, જો કોઈ એકાઉન્ટ નિયમોનું ઉલ્લંઘન કરતું હોવાનું જણાય છે, તો તેનું વેરિફિકેશન દૂર કરવામાં આવશે.