Gujarati News

નવી દિલ્હી, તા.૨૬: કોરોના વાયરસ મહામારી સામે લડવામાં ડોકટરો અને નર્સો સૌથી આગળ છે. તેમના વિના આ જંગમાં ટકી શકાય તેમ નથી. ત્યારે તેઓ યોદ્ઘાઓની જેમ કલાકો સુધી ICU અને વોર્ડમાં ગૂંગળાવી નાખતી PPE કિટ અને N-95 માસ્કમાં ખડેપગે રહે છે. તેનું ગંભીર પરિણામ સામે આવી રહ્યું છે, તેમના વાળ ખરી રહ્યા છે.

જીવનું રક્ષણ કરતાં ફેસ શિલ્ડ, હેન્ડ ગ્લવ્ઝ અને માસ્ક ચામડીના રોગ તેમજ વાળના નબળા સ્વાસ્થ્યનું કારણ બની રહ્યા છે. કલાકો સુધી આ સેફ્ટી ગિયર્સ પહેરી રાખવાના કારણે સ્વાસ્થ્યકર્મીઓને રેશિઝ, ફોલ્લીઓ અને સ્કીન પિગમેન્ટેશન જેવી સમસ્યા થઈ રહી છે, તેમ શહેરના નિષ્ણાોતનું કહેવું છે.

બી.જે. મેડિકલ કોલેજના ડર્મટોલજિ અને વેનેરિયલ ડિસીઝ (DVD) ડિપાર્ટમેન્ટ દ્વારા સર્વે હાથ ધરવામાં આવ્યો હતો. જેમાં બહાર આવ્યું કે, છેલ્લા ૯ મહિનામાં ૧૦માંથી ૭ સ્વાસ્થ્ય કર્મીઓને ડર્મટોલજિકલ સમસ્યા હતી અને તેની સારવાર લેવી પડી હતી.

BJ મેડિકલ કોલેજના DVD ડિપાર્ટમેન્ટના હેડ ડો. ક્રિના પટેલે કહ્યું, સર્વેમાં ૬૦૦થી વધુ લોકોનો સમાવેશ કરવામાં આવ્યો હતો જેમાંથી ૬૬ ટકા સ્વાસ્થ્યકર્મીઓ હતા. ડેટા પરથી સ્પષ્ટ થાય છે કે, લાંબા સમય સુધી માસ્ક પહેરી રાખવાના કારણે એકને (ફોલ્લીઓ) થાય છે. અમે આ સ્થિતિ માટે માસ્ક-ને શબ્દ શોધ્યો છે. સ્વાસ્થ્યકર્મીઓમાં સ્કીનના રોગની ગંભીરતા ૮૦ ટકા જેટલી જોવા મળી હતી કારણકે N-95 માસ્ક એર સકર્યુલેશન અવરોધે છે. જેના કારણે સ્કીનમાંથી તૈલી દ્રવ્યો અને શ્વાસમાંથી ભેજનો ઉપચય થાય છે, તેમ ડો. પટેલે જણાવ્યું.

જે લોકો બંધિયાર ઓફિસમાં કામ કરે છે તેઓ ઓફિસના કલાકો દરમિયાન ડબલ માસ્ક પહેરે છે- એક ફેબ્રિકનું અને બીજું ટ્રીપલ લેયર અથવા N-95. તો આની સ્કીન પર કેવી અસર પડે છે?

શહેરના એક ડર્મટોલજિસ્ટ ડો. અંશુલ વર્મને કહ્યું, લાંબા કલાકો સુધી માસ્ક પહેરી રાખવાના કારણે દ્યણાં દર્દીઓમાં બેકટેરિયલ ઈન્ફેકશન વધ્યું છે. સ્કીન રેશિઝ, માસ્કની પટ્ટી હોય તેની આસપાસના ભાગમાં ડર્મેટાઈટિસ, ખંજવાળ આવવી વગેરે જેવી ફરિયાદો સામાન્ય છે. એવામાં યોગ્ય વાતાવરણમાં યોગ્ય પ્રકારનું માસ્ક પહેરવું જરૂરી છે.

નિષ્ણાતોનું કહેવું છે કે, દરેક સ્થિતિમાં N-95 માસ્ક પહેરવું જરૂરી નથી. તેમ છતાં જો હોસ્પિટલ કે અન્ય કોઈ મેડિકલને લગતા સ્થળ સિવાયની જગ્યાઓએ N-95 માસ્ક પહેરતા હો તો દર ત્રણ-ચાર કલાકે થોડીવાર માટે કાઢવું સલાહનીય છે.

IKDRCના ડાયરેકટર ડો. વિનિત મિશ્રાએ કહ્યું, 'છેલ્લા ૯ મહિનાથી કોરોનાના દર્દીઓની સારવાર કરતા ડોકટરો માટે PPE કિટ બીજી ચામડી જેવી બની ગઈ છે. અમને આજે પણ યાદ છે કે, શરૂઆતની PPE કિટ રેઈનકોટ જેવી હતી. આ PPE કિટ ગૂંથ્યા વિનાના પોલિપ્રોલિનમાંથી બનેલી હતી અને તેમાં શ્વાસ લેવો મુશ્કેલ લાગતો હતો. અમારા દ્યણા સાથીદારોને ચામડીના રોગ થયા હતા. ખાસ કરીને એ જગ્યાએ જયાં માસ્ક અને PPE કિટના લીધે પરસેવો એકત્રિત થતો હોય. પરંતુ હવે અમે આનો ઉપાય શોધી કાઢ્યો છે.

ડો. વર્મનનું કહેવું છે કે, ફેસ શિલ્ડ અને પ્રોટેકિટવ ગિયર્સ પહેરતા સ્વાસ્થ્યકર્મીઓમાં વાળ ખરવાની સમસ્યા જોવા મળી રહી છે. સતત દબાણ અને દ્યર્ષણના કારણે આ સ્થિતિ પેદા થઈ રહી છે. તેમણે કહ્યું, કેટલાક લોકોને સિન્થેટિક મટિરિયલની એલર્જી હોય છે. ખાસ કરીને ગ્લોઝમાં વપરાતું મટિરિયલ એલર્જી કરે છે અને ચામડીના રોગનું કારણ બને છે. ચામડીની સમસ્યાનો સામનો કરતાં ચોથા ભાગના દર્દીઓ સ્વાસ્થ્યકર્મીઓ છે.શહેરના પ્લાસ્ટિક સર્જન ડો. હેમંત સરિયાએ કહ્યું, 'અમે શરીરના વિવિધ ભાગ પર લગાવવા માટે ઓઈનમેન્ટ અને પાવડરનો ઉપયોગ કરવાની સલાહ આપીએ છીએ. PPE કિટની નીચે કોટનના કપડાંનો ઉપયોગ કરવાથી પણ સારા પરિણામ મળ્યા છે. સુનિશ્યિત કરો કે, માસ્ક સ્વચ્છ હોય અને ફરી તેનો ઉપયોગ ના કરો. નાના નાના બ્રેક લો જેથી સ્કીનને શ્વાસ લેવાનો સમય મળે.