Gujarati News

ચંડીગઢ, તા.૨૯: પંજાબના સીએમ ભગવંત માનના કાફલામાં ૪૨ વાહનો છે. એક RTIમાં આ વાત સામે આવી છે. જે મુજબ તેઓ અત્‍યાર સુધી પંજાબના મુખ્‍યમંત્રીઓમાં સૌથી વધુ છે. તેમના કાફલામાં ૪૨ વાહનો સામેલ છે.

મળતી માહિતી મુજબ મુખ્‍યમંત્રીના કાફલામાં ૨૦૦૭-૨૦૧૨ સુધીમાં ૩૩ વાહનો, ૨૦૧૨-૨૦૧૭ સુધીમાં ૩૩ વાહનો, ૨૦૧૭-૨૦૨૧ સુધીમાં ૩૩ વાહનો, ૨૦૨૧-૨૦૨૨ સુધીમાં ૩૯ વાહનો, ૨૦૨૨માં ૪૯ વાહનો અને હવે વર્તમાન સરકારમાં સમાવેશ કરાયો છે.

આરટીઆઈમાં આ માહિતી સામે આવ્‍યા બાદ હવે સીએમ માન વિપક્ષના નિશાના પર આવ્‍યા છે. પોતાને સામાન્‍ય માણસ ગણાવતા ભગવંત માન પર વિપક્ષે ઉગ્ર પ્રહારો કર્યા હતા. કોંગ્રેસ નેતા પ્રતાપ સિંહ બાજવાએ મુખ્‍યમંત્રીના કાફલામાં વાહનોને લઈને મન સરકાર પર નિશાન સાધ્‍યું છે.

બાજવાએ પોતાના ટ્‍વિટમાં કહ્યું કે, ‘૨૦૦૭ થી ૨૦૧૭ સુધી મુખ્‍યમંત્રી રહેલા પ્રકાશ સિંહ બાદલના કાફલામાં ૩૩ વાહનો હતા. તેમના પછી કેપ્‍ટન અમરિંદર સિંહ પંજાબના મુખ્‍યમંત્રી બન્‍યા પરંતુ વાહનોની સંખ્‍યામાં કોઈ ફેરફાર થયો નથી. પોતાને સામાન્‍ય માણસ ગણાવતા ભગવંત માનના કાફલામાં ૪૨ વાહનો છે. તેમણે કહ્યું કે આ ખુલાસો આરટીઆઈ દ્વારા કરવામાં આવ્‍યો છે.

મુખ્‍યમંત્રીના કાફલાને ૪૨ વાહનો પૂરા પાડવામાં આવ્‍યાઃ આરટીઆઈ હેઠળની માહિતીમાં જાણવા મળ્‍યું છે કે ૧ જૂન, ૨૦૨૨ થી રાજ્‍ય પરિવહન કમિશનર (STC)ના કાર્યાલય દ્વારા પંજાબના મુખ્‍યમંત્રીના કાફલાને ૪૨ વાહનો પ્રદાન કરવામાં આવ્‍યા છે. માહિતીમાં જાણવા મળ્‍યું છે કે પૂર્વ સીએમ પ્રકાશ સિંહ બાદલના ૩૧ માર્ચ ૨૦૦૭ થી ૩૦ માર્ચ ૨૦૧૨ સુધીના પ્રથમ કાર્યકાળ દરમિયાન, એસટીસી દ્વારા મુખ્‍યમંત્રીને આપવામાં આવતી કારની સંખ્‍યા ૩૩ હતી. ૩૧ માર્ચ ૨૦૧૨ થી ૩૦ માર્ચ ૨૦૧૭ સુધીના તેમના બીજા કાર્યકાળમાં, સીએમ પ્રકાશ સિંહ બાદલ પાસે તેમના કાફલામાં સમાન સંખ્‍યામાં કાર હતી.

આરટીઆઈ એક્‍ટ હેઠળ મળેલા જવાબ મુજબ, આ વર્ષે ૧૬ માર્ચથી ૧ જૂન સુધી, જ્‍યાં મુખ્‍યમંત્રીના કાફલામાં ૩૯ કાર રહી, ત્‍યારબાદ કાફલામાં વધુ ત્રણ વાહનો ઉમેરવામાં આવ્‍યા. કોંગ્રેસના ધારાસભ્‍ય બાજવાએ માહિતી આપી હતી કે મુખ્‍યમંત્રીના કાફલાને એસટીસી દ્વારા આપવામાં આવેલા ૪૨ વાહનો ઉપરાંત પંજાબ સુરક્ષા વિંગે પણ મુખ્‍યમંત્રીને વાહનો આપ્‍યા છે. જો કે, PSW એ સુરક્ષા કારણોને ટાંકીને કાફલામાં ઉમેરેલા વાહનોની વિગતો શેર કરવાનો ઇનકાર કર્યો હતો.

બીજી તરફ પંજાબના સીએમ ભગવંત માને વિધાનસભામાં કહ્યું કે કોંગ્રેસના ધારાસભ્‍ય સુખપાલ સિંહ ખૈરા હંમેશા સરકારની ટીકા કરે છે. તેણે સરકારના સારા કામો પણ જોવા જોઈએ. રાજકારણીઓએ એવા ભ્રમમાં ન રહેવું જોઈએ કે જો તેઓ ટેલિવિઝન અથવા સોશિયલ મીડિયા પર વધુ બોલે તો લોકો તેમને પસંદ કરે છે.