Gujarati News

રાજકોટ, તા. ૨૧ : ચોમાસુ હવે ઢુકડુ છે ત્યારે રાજકોટ સિંચાઈ વિભાગ દ્વારા ચોમાસા દરમિયાન ગામડાઓ તથા શહેરને પાણી પૂરૂ પાડતા તેમજ સિંચાઈના ડેમો માટેનો ફલડ કન્ટ્રોલ સેલ શરૂ કરી દીધો છે અને આગામી ૧ જૂનથી આ ફલડ કંટ્રોલ સેલ શરૂ કરી દેવા તૈયારીઓ આરંભી દીધી છે.

આ અંગે સત્તાવાર સૂત્રોમાંથી પ્રાપ્ત માહિતી મુજબ દર વર્ષે ચોમાસાના પ્રારંભથી લઈ અને ચોમાસાના વિદાય થાય ત્યાં સુધી અંદાજે ૪ થી ૫ મહિના સુધી સિંંચાઈ વિભાગ દ્વારા તેના કાર્યક્ષેત્રમાં આવતા ડેમો માટે ફલડ કન્ટ્રોલ સેલ કાર્યરત રાખવામાં આવે છે.

ડેમ સાઈટ પર પ્રિ-મોન્સુન ચેકીંગ

ચોમાસા અગાઉ ડેમ સાઈટમાં પ્રિ-મોન્સુન ચેકીંગ કરવામાં આવે છે. જેનો પ્રારંભ કરી દેવાયો છે જે અંતર્ગત ડેમસાઈટના દરવાજા, વાળા સહિતની ક્ષતિ હોય તો મેનુ રીપેરીંગ સહિતની કામગીરી હાથ ધરાઈ છે. આ માટે ગાંધીનગરથી અધિકારીઓની ટુકડી આવીને પણ ડેમ સાઈટનું નિરીક્ષણ કરી રહી છે.

૧ જૂનથી ફલડ સેલનો પ્રારંભ

હવે ચોમાસાનો પ્રારંભ થવામાં છે ત્યારે ૧ જૂનથી રાજકોટ સિંચાઇ વિભાગ દ્વારા ફલડ કંટ્રોલ સેલ શરૂ કરવા તૈયારીઓ શરૂ કરી છે.

આ માટે ૧ ડેપ્યુટી ઈજનેર, ૧ મદદનીશ ઈજનેર, ૨ વાયરલેસ ઓપરેટર સહિતનું સ્ટાફ સેટ અપ ગોઠવવામાં આવ્યુ છે.

આ ફલડ કન્ટ્રોલ સેલ ૨૪ કલાક કાર્યરત રહેશે. જે દરરોજ ડેમ લેવલ, નવા પાણીની આવક, ઓવરફલો કન્ટ્રોલ માટે દરવાજા ખોલવા, ડેમના નિચાણવાસમાં આવતા ગામોમાં તથા નદી કાંઠામાં ચેતવણી  અને દરેક ડેમ ઉપર પડતો દર બે કલાકનો વરસાદ નોંધવા સહિતની કામગીરી થશે.

આમ ૧લી જૂનથી રાજકોટ સિંચાઈ વર્તુળ હેઠળના ડેમો માટે ફલડ કન્ટ્રોલ સેલ શરૂ થઈ જશે.