Gujarati News

(વિનોદ ગાલા દ્વારા)ભુજ તા.૨ :  કચ્છમાં લમ્પીએ મચાવેલા ફફડાટને પગલે સરકાર હવે હરકતમાં આવી ગઈ છે. ગૌમાતા ઓના મોતની  સંખ્યા સબંધે પ્રવર્તતી અવઢવ અને મોટી સંખ્યામાં નીપજેલ મોતના આક્ષેપો વચ્ચે વાયરલ વીડિયો તેમ જ સરકારી તંત્રની કામગીરી સંદર્ભે થઈ રહેલા સવાલોએ હવે જિલ્લા ઉપરાંત રાજ્યમાં ચકચાર સર્જી છે. કોંગ્રેસ પ્રમુખ જગદીશ ઠાકોર તેમ જ કચ્છ ગૌશાળા પાંજરાપોળ યુવા સંઘ દ્વારા મોટી સંખ્યામાં પશુઓના મોત નીપજ્યા હોવાના આક્ષેપો સાથે મુખ્યમંત્રીને દરમ્યાનગીરી કરવા અપીલ કરાઇ હતી. તે વચ્ચે આજે સવારે મુખ્યમંત્રી ભૂપેન્દ્ર પટેલ ભુજ આવ્યા હતા. સવારે કોડકી ખાતે લમ્પી ગ્રસ્ત પશુઓની સ્થિતિ નિહાળી હતી. ત્યારબાદ ભુજમાં તેમણે અધિકારીઓ સાથે સમીક્ષા કરી હતી. તેમની સાથે પશુપાલન મંત્રી રાઘવજી પટેલ તેમ જ જિલ્લા કલેકટર પ્રવિણા ડીકે, જિલ્લા વિકાસ અધિકારી ભવ્ય વર્મા અને અન્ય અધિકારીઓ સાથે ચર્ચા કરી અને સ્થિતિને પહોંચી વળવા માર્ગદર્શન આપ્યું હતું. આ પૂર્વે ભુજમાં પશુઓના વાયરલ થયેલ વીડિયોએ પણ ચકચાર સાથે ચર્ચા જગાવી હતી.