Gujarati News

જસદણ, તા.૮: જસદણમાં વેકરીયા ચોકથી પોલારપર રોડ સુધીનો રોડ જેતે તંત્ર દ્વારા અંદાજે એક વર્ષ પહેલા જ બનાવવામાં આવ્યો હતો. પરંતુ રોડ બન્યાના ગણતરીના દિવસોમાં આ રોડને તોડી રોડની સાઈડમાં ભૂગર્ભ ગટર નાંખવામાં આવી હતી. જેના કારણે રાહદારીઓ અને વાહનચાલકોને આ રોડ પરથી પસાર થવું માથાના દુઃખાવા સમાન બની જવા પામ્યું છે. ત્યારે સવાલ એ થાય છે કે જો તંત્રને આ ભૂગર્ભ ગટર નાંખવાની થતી જ હતી તો અગાઉ શા માટે નવો નક્કોર રોડ બનાવી લાખો રૂપિયાનું પાણી કરવામાં આવ્યું હતું. ભલે આ રોડ તોડી ભૂગર્ભ ગટર નાંખવામાં આવી હતી. પરંતુ બાદમાં આ રોડનું રીપેરીંગ કામ પણ કરવામાં આવ્યું ન હોવાથી દરરોજ નાનામોટા અકસ્માતોના બનાવો બની રહ્યા છે. છતાં જવાબદાર તંત્ર દ્વારા આ રોડ પ્રશ્ને ધ્યાન અપાતું નથી. જેથી જેતે જવાબદાર તંત્ર દ્વારા વહેલી તકે વેકરીયાચોકથી પોલારપર રોડ સુધીના રોડની મરામત કામગીરી હાથ ધરવામાં આવે તેવી જસદણની જાગૃત જનતાની માંગણી ઉઠવા પામી છે.