Gujarati News

રાજકોટ તા. ૨૨: જામનગરમાં કામદાર કોલોની-૩ શુભલક્ષ્મી એપાર્ટમેન્‍ટમાં પહેલા માળે રહેતો ચિરાગ કિરણભાઇ નાકર (બ્રાહ્મણ) (ઉ.વ.૨૩) સાંજે પોણા આઠેક વાગ્‍યે ફલેટના પાંચમા માળની અગાસીએ હતો ત્‍યારે ભેદી રીતે દાઝી જતાં જામનગર સારવાર અપાવી રાજકોટ સિવિલ હોસ્‍પિટલમાં ખસેડવામાં આવતાં હોસ્‍પિટલ ચોકીના રામશીભાઇ વરૂએ જામનગર સી ડિવીઝનમાં જાણ કરી હતી.
ચિરાગ એક બહેનથી નાનો છે. ધોરણ બારમાં નાપાસ થયો હોઇ બીજી વખત પરિક્ષા આપવાની તૈયારી કરી રહ્યો છે. તેના પિતા કર્મકાંડનું કામ કરે છે. ચિરાગે જણાવ્‍યું હતું કે પોતે જ્‍યાં રહે છે એ ફલેટના પાંચમા માળની અગાસી પર સાંજે સિગારેટ પીવા ગયો હતો. સિગારેટ સળગાવી સળગતી દિવાસળી ફેંકતા નજીકમાં જ કોઇએ પેટ્રોલ ભરેલી બોટલ રાખી હોઇ તેના પર દિવાસળી પડતાં ભડકો થતાં પોતે લપેટમાં આવી ગયો હતો. જો કે પોલીસને આ વાત ગળે ઉતરતી ન હોઇ વિશેષ તપાસ યથાવત રાખી છે.