Gujarati News

 કાબુલઃ અફઘાનિસ્તાનના સલામી બેટ્સમેન નજીબ તારકાઈનું નિધન થયું છે. ૨૯ વર્ષના અફઘાની બેટ્સમેન નજીબ શુક્રવારે એટલે કે ૨ ઓકટોબરે એક સડક દુર્દ્યટનાનો શિકાર બન્યા હતા. જેમાં તેઓ ગંભીર રીતે ઘાયલ થયા અને સારવાર દરમિયાન કોમામાં જતા રહ્યા હતા. તેમના માથામાં ઈજા થઈ હતી. આ પછી તેમનું નિધન થયું હતું.

 શુક્રવારે નજીબ પૂર્વ નનગારહરમાં કરિયાણાની દુકાનેથી નીકળીને સડક પાર કરી રહ્યા હતા. ત્યારે ત્યાંથી આવી રહેલી કારે તેમને ટક્કર મારી. ત્યારબાદ તેમને તરત જ હોસ્પિટલ લઈ જવામાં આવ્યા. સલામી બેટ્સમેન નજીબને અફઘાનિસ્તાનની તરફથી એેક વન ડે મેચ અને ૧૨ ટી-૨૦ ઈન્ટરનેશનલ મેચ માટે યાદ કરાશે. ફર્સ્ટ કલાસ ક્રિકેટમાં તેમનું પ્રદર્શન શાનદાર રહ્યું. તેઓએ ૨૪ મેચમાં ૨૦૩૦ રન બનાવ્યા છે જેમાં ૬ શતક અને ૧૦ અર્ધશતક સામેલ છે. તેમની એવરેજ ૪૭થી વધુ રહી છે.

 અફઘાનિસ્તાન ક્રિકેટ બોર્ડે આ ઘટના પર દુઃખ વ્યકત કર્યું અને સોશ્યલ મીડિયા પર લખ્યું કે એસીબી અને ક્રિકેટ પ્રેમી દેશ અફઘાનિસ્તાને પોતાના આક્રમક સલામી બેટ્સમેન અને ખૂબ જ ઉમ્દા વ્યકિત નજીબ તારાકઈને ખોવ્યો છે. એક દુઃખ ટ્રાફિક દુર્દ્યટનામાં તેમનું નિધન થયું છે. અમે સૌ સ્તબ્ધ છીએ. અલ્લાહ તેમની પર રહેમત વરસાવે.(૪૦.૧૧)