વડોદરા, તા.૮ :લાલ સિંહ ચઢ્ઢા' ફ્લોપ થયા બાદ આમિર ખાન બ્રેક પર હતો.  હવે તે કમબેક કરવા જઈ રહ્યો છે, લગભગ સોળ વર્ષ પહેલા આમિરે તારે જમીન પર ફિલ્મ આપી હતી જે હિટ રહી હતી. હવે તે તારે જમીન પરની સિક્વલ બનવા જઈ રહ્યો છે, જેનું નામ *સિતારે જમીન પર* જણાવાયું છે. આ ફિલ્મમાં આમિર ખાન સાથે જેનેલિયા દેશમુખ જોવા મળશે. હાલમાં ફિલ્મનું શૂટિંગ ચાલી રહ્યું છે. આ દરમિયાન સ્ટોરી લઈને એક મોટો સંકેત મળ્યો છે.

આમિર ખાન, તેની બ્લોકબસ્ટર હિટ ફિલ્મો માટે પ્રખ્યાત છે, તેના આગામી સાહસોની આતુરતાપૂર્વક રાહ જોઈ રહેલા વિશાળ વૈશ્વિક ચાહકોનો એક વર્ગ છે. હાલમાં બધાની નજર તેની આગામી ફિલ્મ 'સિતારે જમીન પર' પર છે. તાજેતરના અહેવાલો દર્શાવે છે કે આમિર સતત શૂટિંગમાં વ્યસ્ત છે અને હાલમાં વડોદરાની તીવ્ર ગરમીમાં શૂટિંગ કરી રહ્યો છે.ચાહકો આ પ્રોજેક્ટ પર અપડેટ્સની આતુરતાથી રાહ જોઈ રહ્યા છે કારણ કે અભિનેતા તેના ઑન-સ્ક્રીન અભિનયથી પ્રેક્ષકોને મંત્રમુગ્ધ કરવાનું ચાલુ રાખે છે. ઈન્ડસ્ટ્રીના વિશ્વસનીય સૂત્રના જણાવ્યા અનુસાર, *આમીર ખાન 'સિતારે જમીન પર' માટે બેક ટુ બેક શૂટમાં વ્યસ્ત છે. દિલ્હીનું શેડ્યૂલ પૂરું કર્યા પછી, તે હવે વડોદરામાં શૂટિંગ કરી રહ્યો છે. સુપરસ્ટાર સખત ગરમીમાં અથાક શૂટિંગ કરી રહ્યો છે. 

અભિનેતા આમિર ખાનની તેની ફિલ્મનું શૂટિંગ ગુજરાતના વડોદરામાં કરવા માટે એક ચાર્ટડ ફ્લાઇટ દ્વારા વડોદરા આવ્યો હતો, તે વાસણા-ભાયલી રોડ પરની એક હોટેલમાં રોકાયો હતો. સિતારે જમીન પરનું શૂટિંગ આજથી શરૃ થાય છે, અને તે ૧૨ જૂન સુધી ચાલશે. આ મૂવી સ્પેનિશ સ્પોર્ટ્સ ડ્રામા, કેમ્પિઓન્સ (૨૦૧૮)નું હિન્દી રૃપાંતરણ છે.

આ ફિલ્મમાં આમિર ખાન, જેનેલિયા દેશમુખ અને દર્શિલ સફારી છે. આમિર ખાને તાજેતરમાં ઈન્સ્ટાગ્રામ લાઈવમાં જણાવ્યું હતું કે, આ ફિલ્મ આ વર્ષે ડિસેમ્બરમાં રિલીઝ થવાની આશા છે. ડાઉન સિન્ડ્રોમ પર બનેલી આ ફિલ્મ વિષે આમિરે જણાવ્યું હતું કે તારે જમીન પર તમને રડાવ્યું જ્યારે આ ફિલ્મ સિતારે જમીન પર તમને હસાવશે.