નવી દિલ્‍હી તા.૭: પોતાના હિટ શો ‘‘ધ ગ્રેટ ઇન્‍ડિયન કપિલ શો''ની સીઝન ૩ સાથે શાનદાર વાપસી કરનાર દિગ્‍ગજ કોમેડિયન કપિલ શર્મા ફરી એકવાર સમાચારમાં છે. ‘‘કિસ કિસ કો પ્‍યાર કરું'' ના અભિનેતા અને તેમની પત્‍ની ગિન્ની ચતરથે કેનેડામાં  બ્રિટિશ કોલંબિયાના સરેમાં કેપ્‍સ કાફે શરૂ કર્યું છે.

કપિલ શર્માના મિત્રો અને સાથીદારો તેમના ઇન્‍સ્‍ટાગ્રામ એકાઉન્‍ટ્‍સ પર તેમને અભિનંદન આપી રહ્યા છે. કપિલ શર્માની પત્‍ની ગિન્નીએ તાજેતરમાં જ હળવા ગુલાબી રંગમાં શણગારેલા એક સુંદર સ્‍થળની ઝલક શેર કરી છે, જેણે તરત જ લોકોનું ધ્‍યાન ખેંચવાનું શરૂ કરી દીધું છે. આ સ્‍થળ ઝડપથી લોકોમાં પ્રિય બની ગયું છે, અને કોઈએ તો તેની બધી ખાસ વાતો પણ બતાવી છે.

વિડિઓમાં, કન્‍ટેન્‍ટ સર્જક દર્શકોને કેનેડાના વાનકુવરમાં કેપ્‍સ કાફેની પ્રથમ શાખાના પ્રવાસ પર લઈ જાય છે. તે કાફેની મુલાકાત લે છે, તેના અદભુત ગુલાબી થીમ આધારિત આંતરિક ભાગ બતાવે છે અને ખોરાકનો ઓર્ડર પણ આપે છે. મોટાભાગની સજાવટ ગુલાબી અને સફેદ રંગોમાં બનાવવામાં આવી છે, જે ખૂબ જ અલગ અને અનોખો સ્‍પર્શ આપી રહી છે. શેર કરેલા વીડિયોમાં મેનુ ધ્‍યાનથી જોશો તો તે થોડું મોંઘુ લાગે છે કારણ કે ૫૦૦ રૂપિયાથી ઓછી કિંમતમાં કોઈ વાનગી જોવા મળતી નથી.

ગિન્ની ચતરથે તેના ઇન્‍સ્‍ટાગ્રામ એકાઉન્‍ટ પર નવા કાફેના ઘણા ફોટા શેર કર્યા હતા. કપિલના સાથીદારો જેમ કે કીકુ શારદા, બલરાજ સ્‍યાલ અને અન્‍ય લોકોએ સ્‍ટારને તેમના નવા વ્‍યવસાય માટે અભિનંદન પાઠવ્‍યા છે.

કેપ્‍સ કાફે કપિલ શર્માનું કેનેડામાં પહેલું બિઝનેસ સ્‍ટાર્ટ-અપ છે. કપિલ હાલમાં ધ ગ્રેટ ઇન્‍ડિયન કપિલ શો ની સીઝન ૩ હોસ્‍ટ કરી રહ્યો છે. નવા એપિસોડમાં ભારતીય ટીમના કોચ ગૌતમ ગંભીર સાથે ક્રિકેટ સ્‍ટાર ઋષભ પંત, યુઝવેન્‍દ્ર ચહલ અને અભિષેક શર્મા પણ હતા.(૩૮.૧૪)