21 ઑગસ્ટ, 2025: ફિલ્મ નિર્માતા વિવેક અગ્નિહોત્રીની આગામી ફિલ્મ 'ધ બેંગાલ ફાઇલ્સ'ના ટ્રેલરમાં એક બાળકનું નામ 'તૈમૂર' રાખવામાં આવતા સોશિયલ મીડિયા પર અનેક અટકળો શરૂ થઈ હતી. લોકો અનુમાન લગાવી રહ્યા હતા કે શું આ બોલિવૂડ સ્ટાર્સ સૈફ અલી ખાન અને કરીના કપૂરના પુત્ર 'તૈમૂર અલી ખાન'નો સંદર્ભ છે? આ વિવાદ પર ખુદ વિવેક અગ્નિહોત્રીએ મૌન તોડ્યું છે.

આરજે રૌનકના શોમાં વિવેકે શું કહ્યું?
આરજે રૌનકના શોમાં એક ઇન્ટરવ્યુ દરમિયાન, વિવેક અગ્નિહોત્રીને આ વિશે પૂછવામાં આવ્યું હતું. તેમણે સ્પષ્ટતા કરતા જણાવ્યું કે, "સૈફ પોતાના પુત્રનું નામ તૈમૂર રાખનાર પહેલો વ્યક્તિ નથી, અને ઘણા લોકોના બાળકોનું નામ તૈમૂર છે." જોકે, તેમણે ભારપૂર્વક કહ્યું કે કોઈ પણ ભારતીય વ્યક્તિએ પોતાના બાળકનું નામ તૈમૂર ન રાખવું જોઈએ.

તૈમૂર ભારતીય ઇતિહાસનો હીરો નથી
આ નિવેદન પાછળનું કારણ જણાવતા વિવેકે તૈમૂર લંગના ઇતિહાસનો ઉલ્લેખ કર્યો. તેમણે કહ્યું કે તાશ્કંદમાં 'ધ તાશ્કંદ ફાઇલ્સ'નું શૂટિંગ કરતી વખતે તેઓ તૈમૂરની કબર પર ગયા હતા, જ્યાં લખ્યંત હતું કે 'તેણે દુનિયાના સૌથી ધનિક સુલતાન (દિલ્હી સલ્તનત) પર વિજય મેળવ્યો હતો.' વિવેકે જણાવ્યું કે તૈમૂરે દિલ્હીથી કાશ્મીર સુધી એક જ રાતમાં એક લાખ લોકોને મારી નાખ્યા હતા અને લૂંટફાટ તેમજ બળાત્કાર કર્યા હતા.

તેમણે કહ્યું કે "તૈમૂર કદાચ પોતાના દેશમાં હીરો હોય, પરંતુ તે આપણા દેશ (ભારત) માટે ક્યારેય હીરો ન હોઈ શકે. તેથી, કોઈ પણ ભારતીય માટે પોતાના બાળકનું નામ તેના નામ પર રાખવું સ્વાભાવિક નથી." આ નિવેદન સાથે વિવેકે ભારતીય ઇતિહાસના સંદર્ભમાં 'તૈમૂર' નામના ઉપયોગ પર પોતાનો અભિપ્રાય સ્પષ્ટ કર્યો છે.