મુંબઈ તારીખ:: બોલિવુડની દિગ્ગજ અભિનેત્રી શબાના આઝમીએ તાજેતરમાં પોતાનો 75મો જન્મદિવસ શાનદાર રીતે ઉજવ્યો, જેમાં અનેક મોટા સિતારાઓ હાજર રહ્યા હતા. આ ભવ્ય પાર્ટી ડાન્સ, મસ્તી અને યાદગાર ક્ષણોથી ભરપૂર હતી, પરંતુ સૌથી વધુ ધ્યાન ખેંચ્યું અભિનેત્રી પ્રીતિ ઝિન્ટાના ડાન્સે.

પાર્ટીમાં પ્રીતિએ પોતાના સુપરહિટ ગીત 'ભૂમ્બ્રો' પર ડાન્સ કરીને સૌને મંત્રમુગ્ધ કરી દીધા. આ ગીત અને તેનો ડાન્સ જોઈને ત્યાં હાજર દરેક વ્યક્તિ નોસ્ટાલ્જિક થઈ ગઈ હતી. ફૂલોની પ્રિન્ટવાળા આકર્ષક આઉટફિટમાં સજ્જ પ્રીતિનો ડાન્સ કરતો વીડિયો સોશિયલ મીડિયા પર વાયરલ થઈ રહ્યો છે.

જ્યારે 'મિશન કાશ્મીર' ફિલ્મમાં આ ગીત આવ્યું, ત્યારે દર્શકો પ્રીતિના ચાર્મ અને ડાન્સના દીવાના બની ગયા હતા. ફરી એકવાર, શબાના આઝમીની પાર્ટીમાં તેના ડાન્સે સાબિત કરી દીધું કે પ્રીતિનો ચાર્મ આજે પણ એટલો જ અકબંધ છે. આ વીડિયોએ ચાહકોનો પ્રેમ વધુ મજબૂત બનાવ્યો છે, અને તેઓ પ્રીતિને ફરીથી મોટા પડદા પર જોવા આતુર છે.

બોલિવુડની આવી પાર્ટીઓ હંમેશા યાદગાર રહે છે, પરંતુ પ્રીતિ ઝિન્ટાના આ ડાન્સે આ પાર્ટીને ખરેખર અનફર્ગેટેબલ બનાવી દીધી છે.