મુંબઈ: બોલિવૂડની ગ્લેમરસ અભિનેત્રી તારા સુતારિયા અને તેના લાંબા સમયના બોયફ્રેન્ડ વીર પહારિયા વચ્ચે બધું બરાબર નથી ચાલી રહ્યું. તાજેતરના અહેવાલો મુજબ, આ કપલે તેમના સંબંધોનો "ચુપચાપ" અંત લાવી દીધો છે. આ આશ્ચર્યજનક સમાચાર ગાયક એપી ધિલ્લોનના મુંબઈ કોન્સર્ટ દરમિયાન સર્જાયેલા હંગામાના થોડા દિવસો બાદ જ સામે આવ્યા છે, જેણે નેટીઝન્સમાં અનેક અટકળો જગાડી છે.
શું હતો કોન્સર્ટ ડ્રામા?
થોડા દિવસો પહેલા મુંબઈમાં યોજાયેલા એપી ધિલ્લોનના કોન્સર્ટમાં તારા સુતારિયા સ્ટેજ પર પર્ફોર્મન્સ માટે જોડાઈ હતી. આ દરમિયાન એક ક્લિપ વાયરલ થઈ હતી જેમાં એપી ધિલ્લોન તારાને ગળે લગાવી તેના ગાલ પર હળવી થપ્પડ મારતા જોવા મળ્યા હતા. આ સમયે નીચે પ્રેક્ષકોમાં ઉભેલા વીર પહારિયાના હાવભાવ પણ કેમેરામાં કેદ થયા હતા, જે જોઈને સોશિયલ મીડિયા યુઝર્સ એવો દાવો કરી રહ્યા હતા કે વીર આ નિકટતાથી 'અસ્વસ્થ' દેખાઈ રહ્યા હતા.
' ભ્રામક એડિટિંગ' અને 'પીઆર સ્ટંટ' ના આક્ષેપો
બ્રેકઅપની અફવાઓ વેગ પકડતા તારા સુતારિયાએ અગાઉ ઇન્સ્ટાગ્રામ પર સ્પષ્ટતા કરી હતી કે આ બધું માત્ર ‘ભ્રામક વર્ણન અને સંપાદન' છે. વીર પહારિયાએ પણ ટિપ્પણી કરી હતી કે તેમની જે પ્રતિક્રિયા વાયરલ થઈ રહી છે તે બીજા ગીત દરમિયાનની હતી અને તેનો ખોટો સંદર્ભ લેવામાં આવ્યો છે. જોકે, આ સ્પષ્ટતા છતાં હવે તેમના અલગ થવાના સમાચારે ચાહકોને ચોંકાવી દીધા છે.
પિયાનો અને સૂર્યોદય સુધીના ગીતોની યાદો
તારા અને વીર પહારિયાએ ૨૦૨૫ માં ડેટિંગ શરૂ કર્યું હતું અને ગણેશ ચતુર્થી દરમિયાન પોતાના સંબંધો જાહેર કર્યા હતા. એક ઇન્ટરવ્યુમાં વીરે જણાવ્યું હતું કે તેમની પહેલી ડેટમાં તેમણે પિયાનો વગાડ્યો હતો અને તારાએ સૂર્યોદય સુધી ગીતો ગાયા હતા. આટલી સુંદર પ્રેમકથાનો અંત એક કોન્સર્ટ વિવાદ બાદ આવશે તેવું કોઈએ વિચાર્યું નહોતું. જોકે, બંને તરફથી હજુ સુધી સત્તાવાર રીતે બ્રેકઅપની પુષ્ટિ કરવામાં આવી નથી.