મુંબઈ: બોલીવુડની સૌથી ચર્ચિત અભિનેત્રી મલાઈકા અરોરા હંમેશા તેની લાઈફસ્ટાઈલ અને રિલેશનશિપને લઈને હેડલાઈન્સમાં રહે છે. તાજેતરમાં એક ઈન્ટરવ્યુ દરમિયાન મલાઈકાએ તેના અને અર્જુન કપૂરના સંબંધો વિશે એવી વાત કરી છે જે સાંભળીને તેના ચાહકો આશ્ચર્યમાં મુકાઈ ગયા છે. અર્જુન કપૂર સાથે બ્રેકઅપ થયાને બે વર્ષ જેટલો સમય વીતી ગયો હોવા છતાં, મલાઈકાના મનમાં આજે પણ અર્જુન માટે એક સન્માનજનક અને ખાસ જગ્યા છે.
 મલાઈકાએ ખુલાસા કરતા જણાવ્યું કે, અર્જુન કપૂર સાથે વિતાવેલો સમય તેના જીવનનો એક ખૂબ જ મહત્વપૂર્ણ તબક્કો હતો. ભલે આજે તેઓ સાથે નથી અને બંને પોતાની જીંદગીમાં આગળ વધી ગયા છે, પરંતુ અર્જુન તેના જીવનનો એક અહંમ હિસ્સો રહ્યો છે અને હંમેશા રહેશે. મલાઈકાએ સ્વીકાર્યું કે અરબાઝ ખાન સાથેના લગ્નજીવનના અંત પછી અર્જુને તેને નવો દ્રષ્ટિકોણ આપ્યો હતો.
 પોતાના અંગત જીવન વિશે થતી સતત ચર્ચાઓ પર પ્રહાર કરતા મલાઈકાએ કહ્યું કે, "મારા અંગત જીવન અને ડેટિંગ વિશે સોશિયલ મીડિયા પર ખૂબ જ વાતો થાય છે. પહેલા આ બધી બાબતો મને પરેશાન કરતી હતી, પરંતુ હવે હું આ બધી વાતો પર ધ્યાન આપતી નથી. હું મારું જીવન મારી શરતો પર જીવું છું અને લોકોની ટિપ્પણીઓ હવે મારા માનસિક સુખમાં ખલેલ પહોંચાડી શકતી નથી."
 અત્રે ઉલ્લેખનીય છે કે, મલાઈકા અને અર્જુન લાંબા સમય સુધી રિલેશનશિપમાં રહ્યા હતા અને ઘણીવાર વેકેશન તથા પાર્ટીઓમાં સાથે જોવા મળતા હતા. જોકે, બે વર્ષ પહેલા તેમના અલગ થવાના સમાચારે સૌને ચોંકાવી દીધા હતા. આજે જ્યારે મલાઈકાએ ફરી એકવાર અર્જુન વિશે હકારાત્મક નિવેદન આપ્યું છે, ત્યારે સોશિયલ મીડિયા પર ફરીથી તેમની ‘કેમિસ્ટ્રી’ની ચર્ચાઓ શરૂ થઈ ગઈ છે.