મુંબઈ: માયાનગરી મુંબઈમાં આજે જ્યારે લોકશાહીનું પર્વ એટલે કે BMC ચૂંટણીનું મતદાન ચાલી રહ્યું હતું, ત્યારે જુહુના એક મતદાન મથક પર ફિલ્મી પડદા જેવો જ પણ વાસ્તવિક અને ભાવનાત્મક નજારો જોવા મળ્યો. બોલિવૂડના સુપરસ્ટાર અક્ષય કુમાર જેવી જ પોતાની વોટિંગની ફરજ પૂરી કરીને બહાર નીકળ્યા, ત્યારે એક અજાણી નાની બાળકી સુરક્ષા ઘેરાવને ચીરીને તેમની સામે આવી ગઈ હતી. રડતી આંખે તે બાળકીએ અક્ષયના પગ પકડી લીધા અને ડૂસકાં ભરતા કહ્યું, "પપ્પા દેવામાં ડૂબી ગયા છે, અમને મદદ કરો." આ દ્રશ્ય જોઈ ત્યાં હાજર પાપારાઝી અને લોકોની આંખો પણ ભીની થઈ ગઈ હતી.

સામાન્ય રીતે સ્ટાર્સ આવા સમયે સુરક્ષાને કારણે આગળ વધી જતા હોય છે, પરંતુ અક્ષય કુમારે અહીં પોતાની 'ખિલાડી' છબીથી વિપરીત એક સંવેદનશીલ માનવી તરીકેની ઓળખ આપી. જ્યારે બોડીગાર્ડ્સે છોકરીને દૂર કરવાનો પ્રયાસ કર્યો, ત્યારે અક્ષયે તેમને રોક્યા અને બાળકીની વાત શાંતિથી સાંભળી. બાળકીની લાચારી જોઈને અક્ષયે તરત જ પોતાની ટીમ અને બોડીગાર્ડને સૂચના આપી કે આ બાળકીના પરિવારની તમામ વિગતો મેળવવામાં આવે અને તે ખાતરી કરે કે તેમને જરૂરી આર્થિક મદદ મળી રહે. અક્ષયની આ ત્વરિત પ્રતિક્રિયાએ સાબિત કર્યું કે તે માત્ર પડદા પર જ નહીં, પણ ખરા અર્થમાં જરૂરિયાતમંદો માટે ઉમ્મીદનું કિરણ છે.

આ ઘટનાનો વીડિયો સોશિયલ મીડિયા પર વાયુવેગે વાયરલ થઈ રહ્યો છે અને અક્ષય કુમાર પર પ્રશંસાનો વરસાદ થઈ રહ્યો છે. નેટિઝન્સ કહી રહ્યા છે કે, "હીરો તેને જ કહેવાય જે સામાન્ય માણસની પીડા સમજી શકે." અગાઉ પણ સૈનિકોના પરિવાર માટે કે કુદરતી આફતો સમયે અક્ષયે ઉદાર હાથે દાન આપ્યું છે, પરંતુ જાહેર રસ્તા પર એક બાળકીની વહારે આવવાની આ પળ લોકોના દિલ જીતી ગઈ છે. મુંબઈના આ મતદાન મથકે માત્ર વોટ જ નહીં, પણ અક્ષય કુમારે કરોડો લોકોનો વિશ્વાસ અને પ્રેમ પણ જીતી લીધો છે.