મુંબઈ : બોલિવૂડના દિગ્ગજ સંગીતકાર એ.આર. રહેમાન દ્વારા હિન્દી ફિલ્મ ઉદ્યોગમાં કામ ઘટવા પાછળ 'કોમી પક્ષપાત' હોઈ શકે તેવું સૂચન કર્યા બાદ ફિલ્મ ઈન્ડસ્ટ્રીમાં બે ફાંટા પડી ગયા છે. આ વિવાદમાં હવે 'રોકસ્ટાર' અને 'તમાશા' ફેમ ફિલ્મ સર્જક ઈમ્તિયાઝ અલીએ ઝંપલાવ્યું છે. ઈમ્તિયાઝે રહેમાનનો બચાવ કરતા સ્પષ્ટપણે જણાવ્યું છે કે બોલિવૂડમાં ક્યારેય સાંપ્રદાયિક ભેદભાવ જેવી કોઈ વસ્તુ જોવા મળી નથી.
ઈમ્તિયાઝ અલીનો પક્ષ: "ઉદ્યોગમાં પક્ષપાતને સ્થાન નથી"
રહેમાન સાથે 'અમર સિંહ ચમકીલા' સહિત અનેક ફિલ્મોમાં કામ કરી ચૂકેલા ઈમ્તિયાઝ અલીએ એક મુલાકાતમાં જણાવ્યું કે, "મેં અહીં ઘણો સમય વિતાવ્યો છે અને ક્યારેય કોઈ પ્રકારનો કોમી પક્ષપાત અનુભવ્યો નથી. રહેમાન અત્યંત તેજસ્વી વ્યક્તિ છે અને મને લાગે છે કે તેમના નિવેદનનું ખોટું અર્થઘટન કરવામાં આવ્યું છે." ઈમ્તિયાઝે વધુમાં ઉમેર્યું કે રહેમાનની વાત કદાચ ઉદ્યોગના બદલાતા પાવર સ્ટ્રક્ચર વિશે હતી, જેને લોકોએ ખોટી દિશામાં વાળી દીધી છે.
રહેમાને શું કહ્યું હતું જેનાથી વિવાદ થયો?
એ.આર. રહેમાને બીબીસી એશિયન નેટવર્કને આપેલા ઇન્ટરવ્યુમાં જણાવ્યું હતું કે છેલ્લા આઠ વર્ષમાં બોલિવૂડમાં તેમનું કામ ઘટ્યું છે. તેમણે સૂચવ્યું હતું કે કદાચ સત્તામાં થયેલા પરિવર્તનને કારણે 'સાંપ્રદાયિક બાબત' પણ જવાબદાર હોઈ શકે. રહેમાને કહ્યું કે હવે સર્જનાત્મક નિયંત્રણ કલાકારોને બદલે એવા લોકો પાસે છે જેઓ સંગીતને સમજતા નથી. આ નિવેદન બાદ સોશિયલ મીડિયા પર અને કલાકારોમાં ભારે ચર્ચા શરૂ થઈ હતી.
કંગના રનૌતની આકરી પ્રતિક્રિયા
રહેમાનના આ નિવેદન બાદ અભિનેત્રી અને ભાજપ સાંસદ કંગના રનૌતે વળતો પ્રહાર કરતા આ ટિપ્પણીઓને "પૂર્વગ્રહયુક્ત અને દ્વેષપૂર્ણ" ગણાવી હતી. બીજી તરફ, દિગ્ગજ ગીતકાર જાવેદ અખ્તરે પણ સાંપ્રદાયિક ભેદભાવના સૂચન સાથે અસંમતિ દર્શાવી હતી.
રહેમાને જારી કરી સ્પષ્ટતા
વિવાદ વધતા રવિવારે એ.આર. રહેમાને સોશિયલ મીડિયા પર પોતાની સફાઈ પેશ કરી હતી. તેમણે લખ્યું, "ભારત મારી પ્રેરણા અને મારું ઘર છે. મારો ઈરાદો ક્યારેય કોઈને દુઃખ પહોંચાડવાનો નથી, પરંતુ સંગીત દ્વારા સેવા કરવાનો છે. ક્યારેક ઈરાદાઓને ગેરસમજ થઈ શકે છે."
આ વિવાદ છતાં, રહેમાનના ચાહકો અને ઈમ્તિયાઝ અલી જેવા સાથીઓ માને છે કે રહેમાનની દેશભક્તિ અને કલા પર સવાલ ઉઠાવવા અયોગ્ય છે. બોલિવૂડમાં કલા હંમેશા ધર્મ અને સંપ્રદાયથી ઉપર રહી છે, અને આ વિવાદ જલ્દી શમે તેવી આશા સેવવામાં આવી રહી છે.