મુંબઈ : બોલિવૂડના દિગ્ગજ ડાયરેક્ટર વિશાલ ભારદ્વાજની આગામી ફિલ્મ 'ઓ રોમિયો' અત્યારે ટોક ઓફ ધ ટાઉન બની છે. તાજેતરમાં ફિલ્મના ટ્રેલર લોન્ચ દરમિયાન એક એવો ખુલાસો થયો જેણે સૌને ચોંકાવી દીધા છે. અત્યાર સુધી પડદા પર ચોકલેટી અને રોમેન્ટિક ભૂમિકાઓમાં દેખાયેલા અવિનાશ તિવારી આ ફિલ્મમાં એક ખૂંખાર વિલન તરીકે જોવા મળશે, અને ખાસ વાત એ છે કે આ રોલ માટે તેઓ મેકર્સની પહેલી પસંદગી હતા!
 
ન મોગેમ્બો, ન લંગડા ત્યાગી... કંઈક અલગ જ છે આ 'રોમિયો'
ટ્રેલર લોન્ચ વખતે વિશાલ ભારદ્વાજે સ્ટેજ પરથી જાહેર કર્યું કે, "અવિનાશ, કદાચ તને પણ ખબર નહીં હોય, પણ તારું નામ સાજિદ ભાઈ (નડિયાદવાલા) એ સૂચવ્યું હતું." વિશાલે વધુમાં ઉમેર્યું કે આ પાત્ર આઈકોનિક વિલન મોગેમ્બો કે લંગડા ત્યાગી જેવું નથી, પણ એ બંનેની વચ્ચેનું એક અત્યંત જટિલ અને સમજવામાં મુશ્કેલ પાત્ર છે. અવિનાશે આ રોલ માટે પોતાની જાતને સંપૂર્ણપણે બદલી નાખી છે.
અવિનાશનું આશ્ચર્યજનક ટ્રાન્સફોર્મેશન
ટ્રેલર શરૂ થતાની સાથે જ હોલ તાળીઓ અને સીટીઓથી ગુંજી ઉઠ્યો હતો. શર્ટલેસ લુક, કસરતી શરીર અને માથાની બાજુમાં મુંડન કરેલું ખાસ ટેટૂ - અવિનાશનો આ 'બુલફાઇટર' જેવો અંદાજ અગાઉ ક્યારેય જોવા મળ્યો નથી. 'લૈલા મજનુ' અને 'બુલબુલ' જેવી ફિલ્મોમાં પોતાની માસૂમિયતથી દિલ જીતનાર આ અભિનેતાએ હવે ડાર્ક અને નેગેટિવ શેડમાં પાવરફુલ એન્ટ્રી કરી છે.
વિશાલ અને અવિનાશની જોડીનો જાદુ
આ પહેલીવાર છે જ્યારે અવિનાશ તિવારી અને વિશાલ ભારદ્વાજ સાથે કામ કરી રહ્યા છે. વિશાલે રમૂજમાં કહ્યું કે, "મેં તેને પરેશાન કર્યો અને તેણે મને, પણ અંતે અમે જે પરિણામ મેળવ્યું છે તે અદભૂત છે." અવિનાશની આંખોમાં દેખાતી આક્રમકતા અને તેની સ્ક્રીન પ્રેઝન્સ સાબિત કરે છે કે તે આવનારા સમયમાં બોલિવૂડનો સૌથી સર્વતોમુખી (Versatile) કલાકાર બની રહેશે.
 
વર્કફ્રન્ટ: 'ઓ રોમિયો' ઉપરાંત, અવિનાશ ટૂંક સમયમાં 'ગિની વેડ્સ સની 2' અને 'ઓ સાથી રે' માં પણ જોવા મળશે, જે તેની વધતી જતી લોકપ્રિયતાનો પુરાવો છે.