મુંબઈ: ભારતના 77મા પ્રજાસત્તાક પર્વની ઉજવણી વચ્ચે બોલિવૂડમાં ફરી એકવાર દેશભક્તિનો જુસ્સો ચરમસીમાએ જોવા મળી રહ્યો છે. કોઈપણ દેશની સરહદો ત્યારે જ સુરક્ષિત રહે છે જ્યારે તેના સૈનિકો પોતાનું લોહી સીંચે છે, અને આ જ શૌર્યગાથાને પડદા પર જીવંત કરવામાં બોલિવૂડ હંમેશા મોખરે રહ્યું છે. આ શુક્રવારે રિલીઝ થયેલી બ્લોકબસ્ટર ફિલ્મ 'બોર્ડર 2' એ ફરી એકવાર 1997ની યાદો તાજી કરી દીધી છે. સની દેઓલના દમદાર ડાયલોગ્સ અને આર્મી-નેવી-એરફોર્સના ત્રિવેણી સંગમ જેવી આ ફિલ્મે થિયેટરોને ભારત માતા કી જયના નારાથી ગુંજવી દીધા છે.

વર્ષ 1997માં જેપી દત્તાની 'બોર્ડર' એ જે ઇતિહાસ રચ્યો હતો, તે જ વારસાને 'બોર્ડર 2' આગળ ધપાવી રહી છે. આ વખતે વરુણ ધવન, દિલજીત દોસાંજ અને આહાન શેટ્ટી જેવા યુવા કલાકારો આધુનિક યુદ્ધના મેદાનમાં દુશ્મનોના છક્કા છોડાવતા જોવા મળી રહ્યા છે. આ ફિલ્મ માત્ર મનોરંજન નથી, પરંતુ લોંગેવાલાની લડાઈના એ 120 બહાદુર સૈનિકોના બલિદાનની યાદ અપાવે છે જેમણે પાકિસ્તાની ટેન્કોના ફુરચા ઉડાવી દીધા હતા. દર્શકો આ ફિલ્મને જોઈને ફરી એકવાર ગર્વની લાગણી અનુભવી રહ્યા છે.

બોલિવૂડના ઈતિહાસમાં 'LOC કારગિલ', 'ઉરી: ધ સર્જીકલ સ્ટ્રાઈક' અને 'શેરશાહ' જેવી ફિલ્મોએ દેશભક્તિની વ્યાખ્યા બદલી નાખી છે. વિકી કૌશલના "How's the Josh?" થી લઈને સિદ્ધાર્થ મલ્હોત્રાએ નિભાવેલા કેપ્ટન વિક્રમ બત્રાના "યે દિલ માંગે મોર" ના સૂત્રએ કરોડો ભારતીયોની આંખો ભીની કરી છે. આ ફિલ્મો માત્ર યુદ્ધ બતાવતી નથી, પરંતુ સરહદ પર તૈનાત જવાનના પરિવારની વેદના અને તેના મક્કમ ઈરાદાઓને પણ બખૂબી રજૂ કરે છે, જે નવી પેઢી માટે પ્રેરણાનો સ્ત્રોત બની છે.

વર્ષ 2026ની શરૂઆતમાં રિલીઝ થયેલી ફિલ્મ 'ઇક્કિસ' એ આ લિસ્ટમાં એક નવો આયામ ઉમેર્યો છે. અગસ્ત્ય નંદાએ પરમવીર ચક્ર વિજેતા સેકન્ડ લેફ્ટનન્ટ અરુણ ખેત્રપાલના રોલમાં જીવ રેડી દીધો છે. આ ફિલ્મમાં દિગ્ગજ અભિનેતા ધર્મેન્દ્રની છેલ્લી ઝલક જોવા મળવી એ સિનેમા પ્રેમીઓ માટે એક ભાવુક ક્ષણ છે. 1971ના યુદ્ધના દર્દ અને વીરતાને વણી લેતી આ ફિલ્મ સાબિત કરે છે કે ભારતનું સૈન્ય ગૌરવ અજર-અમર છે. પ્રજાસત્તાક દિને આ ફિલ્મો જોવી એ દરેક ભારતીય માટે ગૌરવની ક્ષણ બની રહે છે.