મુંબઈ, તા. 30 જાન્યુઆરી : બોલીવુડ સુપરસ્ટાર રણવીર સિંહની બહુચર્ચિત સ્પાય થ્રિલર ફિલ્મ 'ધુરંધર' આખરે નેટફ્લિક્સ પર રિલીઝ થઈ ગઈ છે, પરંતુ આ રિલીઝ સાથે જ એક નવો વિવાદ છેડાયો છે. ડિસેમ્બર 2025માં થિયેટરોમાં સફળ પ્રદર્શન બાદ પ્રેક્ષકો આશા રાખી રહ્યા હતા કે OTT પ્લેટફોર્મ પર ફિલ્મનું 'અનકટ' (કોઈપણ કાપ વગરનું) વર્ઝન જોવા મળશે, પરંતુ નેટફ્લિક્સે ફિલ્મના અનેક દ્રશ્યો અને ડાયલોગ્સ પર કાતર ફેરવતા ચાહકોમાં નિરાશા જોવા મળી રહી છે.
દ્રશ્યોમાં કાપ અને ડાયલોગ્સ મ્યુટ કરાયા
ઈન્ટેલિજન્સ બ્યુરોના હાઈ-રિસ્ક મિશન પર આધારિત આ ફિલ્મમાં રણવીર સિંહ ઉપરાંત આર. માધવન, અક્ષય ખન્ના, સંજય દત્ત અને અર્જુન રામપાલ જેવા દિગ્ગજ કલાકારો છે. ફિલ્મને સેન્સર બોર્ડ દ્વારા 'A' (પુખ્ત વયના લોકો માટે) સર્ટિફિકેટ આપવામાં આવ્યું હોવા છતાં, નેટફ્લિક્સ પર અનેક અપશબ્દો મ્યુટ કરી દેવામાં આવ્યા છે. સોશિયલ મીડિયા યુઝર્સના દાવા મુજબ, લગભગ 10 મિનિટ જેટલી ફૂટેજ ટ્રિમ કરવામાં આવી છે અથવા એડિટ કરી દેવામાં આવી છે.
ચાહકોનો રોષ: "અમે પાંચ વર્ષના બાળક નથી"
ફિલ્મ રિલીઝ થતાની સાથે જ સોશિયલ મીડિયા પર ફરિયાદોનું પૂર આવ્યું છે. રોષે ભરાયેલા એક યુઝરે લખ્યું હતું કે, "જ્યારે ફિલ્મ 'A' સર્ટિફાઈડ છે, તો પછી શબ્દો મ્યુટ કરવાનો શું અર્થ છે? શું અમે પાંચ વર્ષના બાળકો છીએ? આ એપ પર જોનારા તમામ 18 વર્ષથી ઉપરના છે." અન્ય એક દર્શકે નિરાશા વ્યક્ત કરતા કહ્યું કે, "મેં અનકટ વર્ઝનની આશા રાખી હતી, પરંતુ થિયેટરની જેમ અહીં પણ અપશબ્દો સેન્સર કરવામાં આવ્યા છે, જેનાથી ફિલ્મનો મૂળ પ્રવાહ ખોરવાઈ રહ્યો છે."
UAE અને ખાડી દેશોમાં રિલીઝ અટકી
નોંધનીય છે કે 'ધુરંધર' ફિલ્મ UAE કે અન્ય GCC (ખાડી દેશો)માં સિનેમાઘરોમાં રિલીઝ થઈ નહોતી, અને હાલમાં ત્યાંના સ્થાનિક OTT પ્લેટફોર્મ્સ પર પણ તે ઉપલબ્ધ નથી. આ સંજોગોમાં ભારતીય ચાહકોમાં આ સેન્સરશિપને લઈને ભારે આક્રોશ જોવા મળી રહ્યો છે. સામાન્ય રીતે OTT પ્લેટફોર્મ્સ તેની સ્વતંત્રતા અને અનકટ કન્ટેન્ટ માટે જાણીતા છે, પરંતુ નેટફ્લિક્સના આ અભિગમે સર્જનાત્મક સ્વતંત્રતા પર સવાલો ઊભા કર્યા છે.
હાલ સુધી નેટફ્લિક્સ દ્વારા આ વિવાદ કે કટ કરવામાં આવેલા દ્રશ્યો અંગે કોઈ સત્તાવાર નિવેદન જાહેર કરવામાં આવ્યું નથી. હવે જોવાનું એ રહેશે કે પ્રેક્ષકોના દબાણ બાદ પ્લેટફોર્મ ફિલ્મના મૂળ વર્ઝનને રિલીઝ કરે છે કે કેમ. હાલમાં તો 'ધુરંધર' તેની વાર્તા કરતા વિવાદોને કારણે વધુ ચર્ચામાં છે.