મુંબઈ: રણવીર સિંહની ફિલ્મ 'ધુરંધર: ધ રિવેન્જ'નું ટીઝર રિલીઝ થતા જ સિનેમા જગતમાં ખળભળાટ મચી ગયો છે. આ વખતે વાર્તા પહેલા કરતા વધુ ડાર્ક, ઈન્ટેન્સ અને ભવ્ય હોવાના સંકેતો મળી રહ્યા છે. આ દરમિયાન ફિલ્મના કાસ્ટિંગને લઈને સૌથી મોટા સમાચાર સામે આવ્યા છે. અહેવાલો મુજબ, 'ઉરી' અને 'આર્ટિકલ ૩૭૦' જેવી હિટ ફિલ્મો આપનાર અભિનેત્રી યામી ગૌતમ પણ આ હાઈ-વોલ્ટેજ ડ્રામાનો હિસ્સો બની ગઈ છે.
સૂત્રોના જણાવ્યા અનુસાર, યામી ગૌતમે આ ફિલ્મ માટે પોતાનું ૫ દિવસનું શૂટિંગ પણ પૂર્ણ કરી લીધું છે. જોકે તેનો રોલ નાનો હોવાનું કહેવાય છે, પરંતુ તે વાર્તામાં એક મોટો ટ્વિસ્ટ લાવશે તે નક્કી છે. આદિત્ય ધરના નિર્દેશનમાં બની રહેલી આ ફિલ્મમાં યામીની એન્ટ્રીથી ફેન્સમાં એ વાતની ચર્ચા જાગી છે કે શું તે ફરી એકવાર કોઈ મજબૂત પાત્રમાં જોવા મળશે?
 આ ફિલ્મ માત્ર રણવીર સિંહ પૂરતી મર્યાદિત નથી, પરંતુ તેમાં સંજય દત્ત, આર. માધવન અને અર્જુન રામપાલ જેવા દિગ્ગજ કલાકારો પણ મહત્વની ભૂમિકામાં છે. ટીઝરમાં રણવીરનો લુક અત્યાર સુધીનો સૌથી ખતરનાક લુક માનવામાં આવી રહ્યો છે. નિર્માતાઓ આ સિક્વલને વૈશ્વિક સ્તરે રજૂ કરવાની તૈયારી કરી રહ્યા છે, જેથી તે પહેલા ભાગના તમામ રેકોર્ડ તોડી શકે.
'ધુરંધર ૨' આગામી ૧૯ માર્ચ, ૨૦૨૬ના રોજ સિનેમાઘરોમાં રિલીઝ થવાની છે. ફિલ્મના ટીઝર અને નવી સ્ટાર કાસ્ટને જોતા અત્યારથી જ એવું લાગી રહ્યું છે કે વર્ષ ૨૦૨૬ની આ સૌથી મોટી બ્લોકબસ્ટર સાબિત થઈ શકે છે. રણવીર સિંહના ફેન્સ લાંબા સમય બાદ તેને આવા પાવરફુલ એક્શન અવતારમાં જોવા માટે આતુર છે.