મુંબઈ, તા. 6: મુંબઈના ઝાકઝમાળ ભર્યા વાતાવરણમાં 'ઝી રિયલ હીરોઝ એવોર્ડ 2026' ની ચોથી આવૃત્તિનું ભવ્ય આયોજન કરવામાં આવ્યું હતું. આ ખાસ કાર્યક્રમમાં રાજકારણ અને રમતગમતની હસ્તીઓ વચ્ચે બોલિવૂડના જાણીતા સંગીતકાર મિથુન શર્મા અને પલક મુછલે આકર્ષણ જમાવ્યું હતું. પ્રખ્યાત ગીતકાર મનોજ મુન્તાશીર સાથેના સંવાદમાં મિથુને તેની ત્રણ દાયકા લાંબી સંગીતમય સફરના અનેક અજાણ્યા પાસાઓ ખોલ્યા હતા.
મનોજ મુન્તાશીરે મિથુનને 'સર' કહીને સંબોધતા તેમની પ્રતિભાના વખાણ કર્યા અને કહ્યું કે, રોમેન્ટિક ગીતોની વાત આવે ત્યારે મિથુનનું નામ સૌથી મોખરે હોય છે. મિથુને પણ આદર સાથે સ્વીકાર્યું કે તેઓ છેલ્લા 30 વર્ષથી ઇન્ડસ્ટ્રીમાં સંગીતકાર તરીકે સક્રિય છે. તેમણે જણાવ્યું કે રોમેન્ટિક ગીતો તેમના હૃદયની ખૂબ નજીક છે કારણ કે તે શ્રોતાઓ સાથે સીધો ભાવનાત્મક સંબંધ બાંધે છે.
'બોર્ડર 2' અને દેશભક્તિનો જઝબો
ચર્ચા દરમિયાન મિથુને તેમની આગામી અને ચર્ચિત ફિલ્મ 'બોર્ડર 2' વિશે ખાસ વાત કરી હતી. તેમણે કહ્યું કે આ ફિલ્મ પર કામ કરવું એ તેમના માટે માત્ર એક પ્રોજેક્ટ નહીં પણ એક ગર્વની ક્ષણ હતી. સૈનિકોના બલિદાન વિશે જાણીને તેમને પ્રેમનો સાચો અર્થ સમજાયો. તેમણે તેમના નવા ગીત "સન ઓફ ધ સોઇલ" (મિટ્ટી કે બેટે) ને પોતાની કારકિર્દીનું સર્વશ્રેષ્ઠ ગીત ગણાવ્યું હતું. આ ગીતની પંક્તિઓ જ્યારે મનોજ મુન્તાશીરે લખી ત્યારે જ ઇતિહાસ રચાઈ ગયો હતો.
ઋષિની ઝૂંપડી જેવો સ્ટુડિયો
સંવાદમાં એક રસપ્રદ વાત એ સામે આવી કે મિથુનનો સ્ટુડિયો બિલકુલ એક 'ઋષિની ઝૂંપડી' જેવો શાંત અને પવિત્ર છે. મનોજ મુન્તાશીરે મજાકમાં કહ્યું કે મિથુન સાથે મિત્રતા કરવા જેવી છે જેથી તેમના આ અનોખા સ્ટુડિયોની મુલાકાત લઈ શકાય.
વર્ષ 2005 માં 'ઝેહર' અને 'કલયુગ' થી પોતાની સફર શરૂ કરનાર મિથુને અત્યાર સુધીમાં 170 થી વધુ ગીતો કંપોઝ કર્યા છે. આજે પણ તેમની નમ્રતા અને કામ પ્રત્યેનું સમર્પણ યુવા કલાકારો માટે પ્રેરણારૂપ છે.