જિયાગંજ:  બોલિવૂડ સુપરસ્ટાર આમિર ખાન અને દેશના સૌથી લોકપ્રિય ગાયક અરિજિત સિંહના ચાહકો માટે એક મોટા સમાચાર સામે આવ્યા છે. તાજેતરમાં પશ્ચિમ બંગાળના મુર્શિદાબાદ જિલ્લાના જિયાગંજમાં અરિજિત સિંહના ઘરે આમિર ખાનની મુલાકાતે સોશિયલ મીડિયા પર ધૂમ મચાવી દીધી હતી. હવે ખુલાસો થયો છે કે આ મુલાકાત માત્ર સૌજન્ય મુલાકાત નહોતી, પરંતુ આમિર ખાન પ્રોડક્શન્સની આગામી ફિલ્મ ‘એક દિન’ (Ek Din) ના સંગીત માટેનો એક ખાસ પ્રોજેક્ટ હતો.

જિયાગંજમાં આમિરનો દેશી અંદાજ

આમિર ખાન ગત અઠવાડિયે કોઈ પણ મોટા લબાચા વગર શાંતિથી અરિજિતના ઘરે પહોંચી ગયો હતો. ત્યાં વિતાવેલા ચાર દિવસો દરમિયાન આમિરનો એક અલગ જ અંદાજ જોવા મળ્યો. તે અરિજિતના ઘરની છત પર પતંગ ઉડાવતો અને સ્થાનિક લોકો સાથે હાથ મિલાવતો જોવા મળ્યો હતો. આમિરે સોશિયલ મીડિયા પર ફોટો શેર કરીને અરિજિતનો આભાર માનતા લખ્યું કે, "આભાર અરિજિત, અમારી ફિલ્મ 'એક દિન' માં તમારો અવાજ આપવા બદલ. તમારી અને તમારા પરિવાર સાથે વિતાવેલા ૪ દિવસ જાદુઈ લાગ્યા."

જુનૈદ ખાન અને સાઈ પલ્લવીની જોડી

ફિલ્મ ‘એક દિન’ માં આમિર ખાનનો પુત્ર જુનૈદ ખાન અને સાઉથની જાણીતી અભિનેત્રી સાઈ પલ્લવી મુખ્ય ભૂમિકામાં છે. આ ફિલ્મ ૧ મે, ૨૦૨૬ ના રોજ રિલીઝ થવાની છે. ફિલ્મનું ટીઝર પહેલેથી જ વાયરલ થઈ ચૂક્યું છે, જે એક જૂની શૈલીની નિખાલસ પ્રેમકથા હોવાની પ્રતીતિ કરાવે છે. અરિજિત સિંહે જ્યારે પ્લેબેક સિંગિંગમાંથી બ્રેક લેવાની વાત કરી હતી, ત્યારે આ ફિલ્મના ગીત માટે તેનો સહયોગ મળવો એ ફિલ્મને સંગીતની દ્રષ્ટિએ વધુ મજબૂત બનાવશે.

કોલેજ પ્રવેશનો વિવાદ

આ મુલાકાત દરમિયાન એક નાનો વિવાદ પણ સર્જાયો હતો. જિયાગંજની રાણી ધન્યા કુમારી કોલેજના પ્રિન્સિપાલે આરોપ લગાવ્યો હતો કે આમિર અને અરિજિતે મધ્યરાત્રિએ પૂર્વ પરવાનગી વિના કોલેજ કેમ્પસમાં પ્રવેશ કર્યો હતો. જોકે, પાછળથી આ પોસ્ટ ડિલીટ કરી દેવામાં આવી હતી. ચાહકોનું માનવું છે કે બંને કલાકારો કદાચ ફિલ્મ માટે લોકેશન રેકી કરવા અથવા શાંતિથી ફરવા નીકળ્યા હશે.

આમિર ખાન અને અરિજિત સિંહની આ જોડીએ હવે ‘એક દિન’ ના સંગીતમાં કેવો જાદુ વેર્યો છે, તેની રાહ તમામ સંગીત પ્રેમીઓ આતુરતાથી જોઈ રહ્યા છે.