નવી દિલ્હી : બોલિવૂડથી હોલીવુડ સુધી પોતાની ઓળખ બનાવનાર પ્રિયંકા ચોપરા જોનાસ હવે દક્ષિણ ભારતીય સિનેમામાં મોટો ધડાકો કરવા જઈ રહી છે. પ્રખ્યાત દિગ્દર્શક એસ.એસ. રાજામૌલીની આગામી તેલુગુ ફિલ્મ 'વારાણસી' (Varanasi) ને લઈને અત્યારથી જ ભારે ઉત્તેજના જોવા મળી રહી છે. આ ઉત્સાહમાં વધારો કરતા પ્રિયંકાના પતિ અને પોપ સિંગર નિક જોનાસે ભવિષ્યવાણી કરી છે કે આ ફિલ્મ ભારતીય સિનેમાની 'આગામી મોટી ફિલ્મ' સાબિત થશે.
એક પોડકાસ્ટ દરમિયાન નિક જોનાસે પત્નીના કામના વખાણ કરતા જણાવ્યું હતું કે, પ્રિયંકા છેલ્લા ૧૪ મહિનાથી આ મેગા પ્રોજેક્ટ પર સખત મહેનત કરી રહી છે. નિકે હસતા હસતા કહ્યું કે, "ભારતમાં પ્રિયંકાને લોકો 'દેશની બહેન' માને છે અને મને 'જીજુ' કહીને બોલાવે છે, તેનો મને ગર્વ છે. તે એક તેજસ્વી કલાકાર અને અદ્ભુત જીવનસાથી છે."
સ્ટાર પાવરથી ભરપૂર હશે 'વારાણસી'
બાહુબલી અને RRR જેવી વૈશ્વિક સફળતા આપનાર રાજામૌલીની આ ફિલ્મમાં માત્ર પ્રિયંકા જ નહીં, પણ સાઉથના સુપરસ્ટાર મહેશ બાબુ અને પૃથ્વીરાજ સુકુમારન પણ મુખ્ય ભૂમિકામાં જોવા મળશે. આ એક હાઈ-ઓક્ટેન એક્શન એડવેન્ચર ફિલ્મ હોવાનું મનાય છે, જેની રિલીઝ ડેટ ૭ એપ્રિલ, ૨૦૨૭ નક્કી કરવામાં આવી છે.
હોલીવુડમાં પણ પ્રિયંકાનો સિક્કો
માત્ર સાઉથની ફિલ્મો જ નહીં, પ્રિયંકા હોલીવુડમાં પણ ધૂમ મચાવી રહી છે. તેની આગામી હોલીવુડ ફિલ્મ 'ધ બ્લફ' (The Bluff) ૨૫ ફેબ્રુઆરીથી પ્રાઇમ વિડિયો પર સ્ટ્રીમ થવા જઈ રહી છે. આ ફિલ્મમાં તે એક ભૂતપૂર્વ મહિલા ચાંચિયા (Pirate) ના રોલમાં જોવા મળશે જે પોતાના પરિવારને બચાવવા માટે હિંસક ભૂતકાળનો સામનો કરે છે. રુસો બ્રધર્સ દ્વારા નિર્મિત આ ફિલ્મમાં પ્રિયંકાનો અત્યાર સુધીનો સૌથી રફ અને ટફ લુક જોવા મળશે.
એક તરફ રાજામૌલીનું વિઝન અને બીજી તરફ પ્રિયંકા ચોપરાનો અભિનય - આ જુગલબંધી બોક્સ ઓફિસ પર નવા રેકોર્ડ સર્જે તો નવાઈ નહીં!