મુંબઈ: બોલિવૂડની 'મસાકલી' અને જાણીતી અભિનેત્રી સોનમ કપૂર ટૂંક સમયમાં જ બીજી વાર માતા બનવા જઈ રહી છે. તાજેતરમાં સોનમનો બેબી શાવર (સીમંત) સમારોહ અત્યંત ધામધૂમથી યોજાયો હતો, જેમાં ગ્લેમર કરતા વધુ સનાતન ધર્મની પરંપરાઓનો પ્રભાવ જોવા મળ્યો હતો. સોનમે પોતે આ સમારોહનો એક સુંદર વીડિયો સોશિયલ મીડિયા પર શેર કરી 'સીમંતોન્નયન' સંસ્કારના ગૂઢ અર્થ વિશે વિશ્વને માહિતગાર કર્યું છે.
સોળ સંસ્કારોમાંનું એક: સીમંતોન્નયન
સોનમે ઈન્સ્ટાગ્રામ પર શેર કરેલા વીડિયો સાથે એક હૃદયસ્પર્શી કેપ્શન લખ્યું છે. તેણે જણાવ્યું કે, "સીમંતોન્નયન એ સનાતન ધર્મના ૧૬ પવિત્ર ગર્ભ સંસ્કારોમાંનો ત્રીજો સંસ્કાર છે. આ વિધિ માત્ર એક ઉજવણી નથી, પરંતુ માતા અને તેના ગર્ભમાં ઉછરી રહેલા નવા જીવનનું સન્માન છે." તેણે વધુમાં ઉમેર્યું કે ભારતના અલગ-અલગ રાજ્યોમાં તેને 'ગોદ ભરાઈ', 'શ્રીમંત', 'દોહલે જેવણ' કે 'વલૈકાપ્પુ' જેવા વિવિધ નામોથી ઓળખવામાં આવે છે, પરંતુ તેનો મૂળ ભાવ પ્રેમ અને રક્ષણનો જ છે.
પરિવાર અને મિત્રોનો સંગાથ
આ ખાસ પ્રસંગે આખો કપૂર પરિવાર એકસાથે જોવા મળ્યો હતો. સોનમે પોતાની માતા સુનીતા કપૂર, સાસુ અને બહેન રિયા કપૂરનો આભાર માનતા કહ્યું કે તેમના સાથ અને આયોજન વગર આ વિધિ આટલી અર્થપૂર્ણ ન બની હોત. ફેશન આઈકોન હોવા છતાં, સોનમે પોતાની મૂળ ભારતીય પરંપરાઓને જે રીતે અપનાવી છે, તેની ચાહકો સોશિયલ મીડિયા પર ભારે પ્રશંસા કરી રહ્યા છે.
વૈજ્ઞાનિક અને આધ્યાત્મિક મહત્વ
શાસ્ત્રો મુજબ, સીમંતોન્નયન સંસ્કાર ગર્ભાવસ્થાના ત્રીજા ત્રિમાસિક ગાળામાં કરવામાં આવે છે. તેનો મુખ્ય હેતુ અજાત બાળકને માનસિક અને શારીરિક રીતે સુરક્ષિત રાખવાનો તેમજ માતાને પ્રસૂતિ દરમિયાન થતી પીડામાંથી રાહત અપાવવાનો છે. આ વિધિમાં પતિ દ્વારા પત્નીના વાળમાં વડની ડાળી ફેરવવાની જે પરંપરા છે, તે પત્નીના સારા સ્વાસ્થ્ય અને દીર્ધાયુની પ્રાર્થનાનું પ્રતીક છે.
સોનમ કપૂરની આ પરંપરાગત ઉજવણીએ સાબિત કરી દીધું છે કે ભલે આપણે ગમે તેટલા આધુનિક બનીએ, પણ આપણા મૂળિયાં અને સંસ્કારો હંમેશા આપણી સાથે રહે છે.