મુંબઈ:  બોલીવુડના સુપ્રસિદ્ધ પટકથા લેખક સલીમ ખાન છેલ્લા આઠ દિવસથી મુંબઈની લીલાવતી હોસ્પિટલમાં મરણતોલ જંગ લડી રહ્યા હતા, પરંતુ હવે તેમના લાખો ચાહકો માટે સુખદ સમાચાર સામે આવ્યા છે. 17 ફેબ્રુઆરી, 2026 ના રોજ મગજમાં લોહીના ગઠ્ઠા (ન્યૂનતમ હેમરેજ) ને કારણે તેમને તાત્કાલિક દાખલ કરવામાં આવ્યા હતા. 90 વર્ષની જૈફ વયે આટલી મોટી સર્જરી થતા ઉદ્યોગમાં ચિંતાનું મોજું ફરી વળ્યું હતું. જોકે, સલમાન ખાનની ફિલ્મ ‘જય હો’ ની સહ-અભિનેત્રી ડેઝી શાહે પુષ્ટિ કરી છે કે સલીમ ખાનની સર્જરી સફળ રહી છે અને તેઓ હવે સ્થિર છે. ડેઝીના જણાવ્યા મુજબ, તેઓ ખાન પરિવાર સાથે સતત સંપર્કમાં છે અને સલીમ સર હવે ડોક્ટરોની દેખરેખ હેઠળ રિકવરી કરી રહ્યા છે.

સલીમ ખાનના હોસ્પિટલમાં દાખલ થયા બાદ ખાન પરિવાર અને હોસ્પિટલ પ્રશાસન વચ્ચે તબીબી માહિતીની ગુપ્તતાને લઈને થોડો તણાવ પણ જોવા મળ્યો હતો. અહેવાલો મુજબ, સલમાન ખાન અને તેનો પરિવાર હોસ્પિટલ દ્વારા જારી કરાયેલા પબ્લિક મેડિકલ બુલેટિનથી નારાજ હતા. ખાન પરિવારનું માનવું છે કે સ્વાસ્થ્ય એ વ્યક્તિગત બાબત છે અને તેને પરિવારની પરવાનગી વિના મીડિયામાં જાહેર ન કરવી જોઈએ. આ નારાજગી બાદ હોસ્પિટલે સત્તાવાર નિવેદનો આપવાનું બંધ કરી દીધું છે. હાલમાં સલીમ ખાનને વેન્ટિલેટર સપોર્ટ પરથી હટાવી લેવામાં આવ્યા છે અને તેમની તબિયતમાં ક્રમશઃ સુધારો જોવા મળી રહ્યો છે, જે પરિવાર માટે મોટી રાહતની વાત છે.

સલીમ ખાનની તબિયત બગડતા જ આખું બોલીવુડ લીલાવતી હોસ્પિટલ ઉમટી પડ્યું હતું. શાહરૂખ ખાન, આમિર ખાનથી લઈને રણવીર સિંહ અને જાવેદ અખ્તર જેવા દિગ્ગજોએ સલમાન ખાન અને તેના ભાઈઓની મુલાકાત લીધી હતી અને સલીમ સાહેબના ઝડપી સ્વસ્થ થવાની પ્રાર્થના કરી હતી. સોશિયલ મીડિયા પર પણ 'ગેટ વેલ સૂન' ના મેસેજીસનો પૂર આવ્યો છે. સલીમ ખાનની મજબૂત ઈચ્છાશક્તિ અને ડોક્ટરોની મહેનત રંગ લાવી છે. હવે ચાહકો એ દિવસની આતુરતાથી રાહ જોઈ રહ્યા છે જ્યારે બોલીવુડના આ 'ટાઇગર' પોતાના ઘર 'ગેલેક્સી એપાર્ટમેન્ટ' પર પરત ફરશે.