મુંબઈ, તા.૦૨: UPSCની તૈયારી કરતા લાખો યુવાનોના હૃદયને સ્પર્શી ગયેલી વેબ સીરીઝ 'એસ્પિઅન્ટ્સ' (Aspirants) ફરી એકવાર ડિજિટલ પડદા પર ધમાકો કરવા તૈયાર છે. વર્ષ 2021માં જ્યારે પહેલી સીઝન આવી ત્યારે તેણે સફળતાના તમામ રેકોર્ડ તોડી નાખ્યા હતા. હવે, ચાહકોની લાંબી પ્રતીક્ષાનો અંત આવ્યો છે કારણ કે મેકર્સ દ્વારા ઓફિશિયલ પોસ્ટર સાથે સીઝન-3ની ગ્રાન્ડ જાહેરાત કરી દેવામાં આવી છે. આ વખતે વાર્તામાં માત્ર IAS બનવાનો સંઘર્ષ જ નહીં, પણ વેરવિખેર થતા સંબંધોને સાચવવાની કસોટી પણ જોવા મળશે.

સંબંધો અને સપનાઓ વચ્ચેનો જંગ

એમેઝોન પ્રાઇમ વીડિયોએ તેના ઇન્સ્ટાગ્રામ હેન્ડલ પર નવું પોસ્ટર શેર કરતા એક દમદાર લાઇન લખી છે: "તૈયારી ફક્ત કારકિર્દી માટે જ નહીં પરંતુ સંબંધો માટે પણ છે." આ સીઝનમાં દિલ્હીના ઓલ્ડ રાજેન્દ્ર નગરમાં રહેતા ત્રણ અતૂટ મિત્રો—અભિલાષ, ગુરી અને એસકેની જિંદગીના નવા વળાંકો જોવા મળશે. કોચિંગ ક્લાસની દોડધામ, મિત્રો સાથેની ચાની ચર્ચાઓ અને નિષ્ફળતાના ડર વચ્ચે આ ત્રણેય કેવી રીતે પોતાના અસ્તિત્વની લડાઈ લડે છે, તે જોવું રસપ્રદ રહેશે.

શું હશે ત્રીજી સીઝનમાં ખાસ?

ત્રીજી સીઝન મુખ્યત્વે બે અલગ-અલગ ટાઇમલાઇન પર ચાલશે. એક તરફ ભૂતકાળનો સંઘર્ષ હશે અને બીજી તરફ વર્તમાનમાં DM બનેલા અભિલાષની જિંદગી. આ વખતે વાર્તામાં મોટો ટ્વિસ્ટ 'સંદીપ ભૈયા' લાવવાના છે. સંદીપ ભૈયાએ અભિલાષ પર લગાવેલા ગંભીર આરોપોને કારણે અભિલાષની વ્યાવસાયિક અને વ્યક્તિગત જિંદગીમાં ધરતીકંપ આવવાનો છે. જૂની મિત્રતામાં પડેલી તિરાડ ભરાશે કે વધુ ઊંડી થશે, તે આ સીઝનનો મુખ્ય આકર્ષણનો મુદ્દો છે.

ક્યારે અને ક્યાં જોઈ શકશો?

દીપેશ સુમિત્રા જગદીશ દ્વારા નિર્દેશિત આ સીરીઝમાં નવીન કસ્તુરિયા (અભિલાષ), શિવંકિત સિંહ પરિહાર (ગુરી), અભિલાષ થાપલિયાલ (SK) અને સોશિયલ મીડિયાના ફેવરિટ સન્ની હિન્દુજા (સંદીપ ભૈયા) ફરી એકવાર પોતાની જૂની ભૂમિકામાં જોવા મળશે. આ વખતે જતીન ગોસ્વામીની એન્ટ્રીથી વાર્તામાં નવો વળાંક આવશે. ડાયરીમાં નોંધી લેજો, 'એસ્પિઅન્ટ્સ સીઝન 3' આગામી 13 માર્ચથી એમેઝોન પ્રાઇમ પર સ્ટ્રીમ થવા જઈ રહી છે.