મુંબઈ | તા.20: ટેલિવિઝનની દુનિયાની લાડકી કોમેડિયન ભારતી સિંહ અને તેના પતિ હર્ષ લિંબાચિયાએ તેમના લાખો ચાહકોની લાંબી પ્રતીક્ષાનો અંત લાવ્યો છે. આ સેલિબ્રિટી કપલે તેમના બીજા પુત્ર, જેનું લાડકું નામ 'કાજુ' અને સત્તાવાર નામ 'યશવીર' છે, તેનો ચહેરો સત્તાવાર રીતે જાહેર કર્યો છે. ગુડી પડવાના પવિત્ર તહેવાર નિમિત્તે એક ખાસ યુટ્યુબ વ્લોગ દ્વારા તેમણે આ ખુશખબર શેર કરી હતી.

થોડીક વારમાં જ વીડિયો થયો વાયરલ

ભારતી અને હર્ષે કાજુના ફેસ રિવિલ માટે એક ખાસ 'સી બ્રિઝ' (Sea Breeze) થીમ આધારિત પાર્ટીનું આયોજન કર્યું હતું. વીડિયોમાં નાનકડા યશવીરને જોતા જ ચાહકો મંત્રમુગ્ધ થઈ ગયા હતા. મોટાભાગના ચાહકોનું માનવું છે કે કાજુ તેનો મોટો ભાઈ 'ગોલા' (લક્ષ્ય) કરતા થોડો અલગ છે અને તે આબેહૂબ તેના પિતા હર્ષ લિંબાચિયા જેવો દેખાય છે. સોશિયલ મીડિયા પર કોમેન્ટ્સનો વરસાદ થઈ રહ્યો છે, જેમાં લોકો તેને "હર્ષની નકલ" અને "ક્યુટનેસ ઓવરલોડેડ" ગણાવી રહ્યા છે.

પરિવારમાં ખુશીનો માહોલ

ભારતી સિંહ તેના વ્લોગ્સ દ્વારા હંમેશા તેના અંગત જીવનની પળો ચાહકો સાથે શેર કરતી હોય છે. કાજુના જન્મ બાદથી જ તેના ફેસ રિવિલને લઈને ફેન્સમાં ભારે ઉત્સુકતા હતી. ભારતીએ વીડિયોમાં જણાવ્યું હતું કે, આ તહેવાર અમારા પરિવાર માટે ખૂબ જ ખાસ છે અને તેથી જ અમે યશવીરને દુનિયા સામે લાવવા માટે આ દિવસ પસંદ કર્યો છે. વીડિયોમાં મોટા ભાઈ ગોલા અને નાના કાજુની કેમિસ્ટ્રી પણ ચાહકોનું દિલ જીતી રહી છે.

ચાહકોએ પાઠવી શુભેચ્છાઓ

ભારતીના વ્લોગ પર માત્ર સામાન્ય લોકો જ નહીં પણ ટેલિવિઝન જગતના અનેક કલાકારોએ પણ અભિનંદન પાઠવ્યા છે. ભારતી અને હર્ષની જોડી હંમેશા તેમના રમૂજી સ્વભાવ માટે જાણીતી છે, અને હવે તેમના બે પુત્રો સાથેનો આ ક્યુટ પરિવાર સોશિયલ મીડિયા પર છવાયેલો રહે છે.