મુંબઈ:હિન્દી સિનેમાના પ્રતિભાશાળી અભિનેતા અક્ષય ખન્ના ફરી એકવાર પડદા પર પોતાની અભિનય ક્ષમતાનો પરચો આપવા માટે સજ્જ થયા છે. તાજેતરમાં ફિલ્મ 'ધુરંધર'માં ડાકુ 'રહેમાન ડકૈત'ના પાત્રમાં શાનદાર પર્ફોર્મન્સ આપીને વાહવાહી મેળવનાર અક્ષય હવે દક્ષિણ ભારતીય સિનેમામાં કદમ રાખવા જઈ રહ્યો છે. ફિલ્મ નિર્માતા પ્રશાંત વર્માની આગામી બિગ બજેટ ફિલ્મ 'મહાકાલી'માંથી અક્ષય ખન્નાનો ફર્સ્ટ લૂક જાહેર કરવામાં આવ્યો છે, જેમાં તે અત્યંત રહસ્યમય અને પ્રભાવશાળી અસુર ગુરુ શુક્રાચાર્યની ભૂમિકામાં નજર આવશે.
જન્મદિવસે લૂક રિલીઝ કરી અનોખી ભેટ આપી
અક્ષય ખન્નાના જન્મદિવસના ખાસ અવસરે ફિલ્મ નિર્માતા પ્રશાંત વર્માએ સોશિયલ મીડિયા પર આ ખાસ લૂક શેર કર્યો હતો. આ ફિલ્મ સાથે અક્ષય ખન્ના તેલુગુ ફિલ્મ ઈન્ડસ્ટ્રીમાં પદાર્પણ કરી રહ્યો છે. 'મહાકાલી'માં તેનું પાત્ર શુક્રાચાર્યનું છે, જે પૌરાણિક કથાઓ મુજબ અસુરોના અત્યંત બુદ્ધિશાળી અને શક્તિશાળી ગુરુ માનવામાં આવે છે. સોશિયલ મીડિયા પર આ લૂક રિલીઝ થતાની સાથે જ વાયરલ થઈ ગયો છે અને સિનેપ્રેમીઓમાં ફિલ્મ પ્રત્યેની ઉત્સુકતા બેવડાઈ ગઈ છે.
પ્રથમ મહિલા સુપરહીરો ફિલ્મ હોવાનું અનુમાન
પ્રશાંત વર્માના સિનેમેટિક યુનિવર્સના ભાગ સમાન આ ફિલ્મનું દિગ્દર્શન પૂજા અપર્ણા કોલુરુ કરી રહ્યા છે. આ ફિલ્મમાં ભૂમિ શેટ્ટી મુખ્ય ભૂમિકા ભજવી રહી છે અને એવું માનવામાં આવે છે કે આ ભારતની પ્રથમ મહિલાલક્ષી સુપરહીરો ફિલ્મ હશે. ફિલ્મમાં અક્ષય ખન્નાની હાજરી તેને વધુ મજબૂત બનાવે છે. નિર્માતા પ્રશાંત વર્માએ અક્ષયના વખાણ કરતા જણાવ્યું હતું કે, અક્ષય એક એવો કલાકાર છે જેને પોતાની ક્ષમતા સાબિત કરવા માટે કોઈ વિશેષ નાટક કે યુક્તિઓની જરૂર પડતી નથી, તેની સ્ક્રીન પ્રેઝન્સ જ દર્શકોને જકડી રાખવા માટે કાફી છે.
ચાહકોમાં ભારે ઉત્તેજના
'ધુરંધર'માં ડાકુના રોલ દ્વારા લાઈમલાઈટ ચોરી લેનાર અક્ષય ખન્નાના નવા અવતારથી ચાહકો ખૂબ જ ઉત્સાહિત છે. તેલુગુ સિનેમામાં અક્ષયનો આ પ્રવેશ બોલિવૂડ અને સાઉથ વચ્ચેના વધતા જતા સમન્વયનું વધુ એક ઉદાહરણ છે. મોટા પાયે બની રહેલી આ ફિલ્મમાં અક્ષયની શુક્રાચાર્ય તરીકેની ભૂમિકા વાર્તામાં વળાંક લાવનારી અને પાવરફુલ સાબિત થશે તેવું લૂક જોતા લાગી રહ્યું છે. હાલમાં આ ફિલ્મનું શૂટિંગ ચાલી રહ્યું છે અને ટૂંક સમયમાં તેની વધુ વિગતો જાહેર કરવામાં આવશે.