મુંબઈ:  ભારતીય સિનેમાના બે સૌથી મોટા દિગ્ગજો, અમિતાભ બચ્ચન અને રજનીકાંત વચ્ચેનો સંબંધ માત્ર વ્યાવસાયિક નથી, પણ અત્યંત ઊંડો અને આદરયુક્ત છે. તાજેતરમાં સુપરસ્ટાર રજનીકાંતે અમિતાભ બચ્ચનના જીવનના એ સૌથી મુશ્કેલ તબક્કા વિશે વાત કરી હતી, જ્યારે બોલિવૂડનો આ 'શહેનશાહ' આર્થિક રીતે સંપૂર્ણપણે તૂટી ગયો હતો. રજનીકાંતે જણાવ્યું કે કેવી રીતે ભારે દેવાના બોજ હેઠળ દબાયેલા અમિતજીએ પોતાની મિલકતો અને મુંબઈનું ઘર પણ વેચવું પડ્યું હતું.
નિષ્ફળતા અને લોકોની ક્રૂર મજાક
૧૯૯૦ના દાયકાના અંતમાં અમિતાભ બચ્ચને પોતાની કંપની 'ABCL' શરૂ કરી હતી, જે કમનસીબે નિષ્ફળ રહી અને તેમને કરોડોના દેવામાં ડૂબાડી દીધા. રજનીકાંતે યાદ કરતા કહ્યું કે, "જ્યારે તેઓ મુશ્કેલીમાં હતા, ત્યારે ઉદ્યોગના જ કેટલાક લોકોએ તેમની મદદ કરવાને બદલે તેમના પતનની મજાક ઉડાવી હતી." પરંતુ અમિતાભ બચ્ચને હાર માનવાને બદલે મૌન રહીને લડત આપવાનું નક્કી કર્યું.
યશ ચોપરાના ઘરે ‘કામ’ ની શોધમાં
રજનીકાંતે એક હૃદયસ્પર્શી કિસ્સો શેર કરતા જણાવ્યું કે, એક દિવસ અમિતાભ બચ્ચન પાસે ડ્રાઈવરને ચૂકવવાના પૈસા પણ નહોતા. તેઓ પોતે ગાડી ચલાવીને, ઓળખ છુપાવવા 'વાંદરા ટોપી' પહેરીને દિગ્દર્શક યશ ચોપરાના ઘરે પહોંચ્યા હતા. યશ ચોપરાએ તેમને સહી કરેલો કોરો ચેક આપવાની ઓફર કરી, પણ સ્વાભિમાની અમિતજીએ તેને નકારી કાઢી અને કહ્યું, "મને પૈસા નહીં, કામ આપો." આ જ મુલાકાતે ફિલ્મ 'મોહબ્બતેં' ના દ્વાર ખોલ્યા.
બીજી ઈનિંગ અને અકલ્પનીય મહેનત
'મોહબ્બતેં' અને 'કૌન બનેગા કરોડપતિ' (KBC) ના આગમન સાથે અમિતાભ બચ્ચનનું નસીબ ફરી ચમક્યું. રજનીકાંતે ભાવુક થઈને ઉમેર્યું કે, "પોતાનું દેવું ચૂકવવા માટે અમિતજીએ નાની-મોટી તમામ પ્રકારની જાહેરાતો કરી. ખરાબ તબિયત હોવા છતાં તેઓ દિવસના ૧૮-૧૮ કલાક કામ કરતા હતા." સતત ત્રણ વર્ષની આકરી મહેનત બાદ તેમણે પાઈ-પાઈ ચૂકવી દીધી અને ફરી એકવાર ભારતીય સિનેમાના સિંહાસન પર બિરાજમાન થયા.
નોંધનીય છે કે, ૧૯૯૧માં આવેલી ફિલ્મ 'હમ' માં રજનીકાંત અને અમિતાભ બચ્ચને સાથે કામ કર્યું હતું. આજે રજનીકાંત જ્યારે આ વાતો યાદ કરે છે, ત્યારે તે માત્ર એક અભિનેતાની સફર નહીં પણ અડગ મનોબળ અને લડાયક મિજાજની પ્રેરણાદાયી ગાથા બની જાય છે.