મુંબઈ : બૉલિવૂડમાં અત્યારે જે ફિલ્મોની સૌથી વધુ ચર્ચા થઈ રહી છે તેમાં 'ધુરંધર' ફ્રેન્ચાઈઝી મોખરે છે. 'ધુરંધર' અને તેની સિક્વલ 'ધુરંધર: ધ રિવેન્જ' એ બોક્સ ઓફિસ પર ધૂમ મચાવીને અનેક રેકોર્ડ તોડ્યા છે. આ ફિલ્મોની સફળતાનો સૌથી મોટો ફાયદો એ કલાકારોને થયો છે જેઓ લાંબા સમયથી ગુમનામીમાં ખોવાઈ ગયા હતા. ખાસ કરીને સિનિયર અભિનેતા રાકેશ બેદીએ આ ફિલ્મમાં ભજવેલા 'જમીલ જમાલી'ના પાત્રને કારણે ફરી એકવાર દર્શકોમાં જબરદસ્ત લોકપ્રિયતા મેળવી છે. જોકે, આ સફળતાની વચ્ચે રાકેશ બેદીએ એક એવા સમાચાર આપ્યા છે જે સાંભળીને ચાહકો ચોક્કસપણે નિરાશ થશે.
તાજેતરમાં ઉજ્જૈન ખાતે એક કાર્યક્રમમાં હાજરી આપવા પહોંચેલા રાકેશ બેદીએ પત્રકારો સાથેની વાતચીતમાં સ્પષ્ટ કર્યું હતું કે, ભવિષ્યમાં 'ધુરંધર 3' બનવાની કોઈ શક્યતા નથી. તેમણે આ અંગે વધુ ખુલાસો કરતા જણાવ્યું કે, ભલે ફિલ્મ બ્લૉકબસ્ટર સાબિત થઈ હોય અને સારી કમાણી કરી રહી હોય, પરંતુ હાલમાં તેના ત્રીજા ભાગ માટે કોઈ આયોજન નથી. રાકેશ બેદીએ આ વાત કહીને એ તમામ અટકળો પર પૂર્ણવિરામ મૂકી દીધું છે જે સોશિયલ મીડિયા પર 'ધુરંધર 3' ને લઈને ચાલી રહી હતી.
રાકેશ બેદીએ ફિલ્મની સફળતાનો સંપૂર્ણ શ્રેય ડિરેક્ટર આદિત્ય ધરને આપતા કહ્યું હતું કે, આ ફિલ્મનો કન્સેપ્ટ અને સાચી મહેનત આદિત્યની જ છે. તેમણે નમ્રતાપૂર્વક ઉમેર્યું કે, "એક કલાકાર તરીકે મેં માત્ર મને સોંપવામાં આવેલી ભૂમિકા પ્રમાણિકતાથી ભજવવાની મારી ફરજ નિભાવી હતી." આ ફિલ્મે રાકેશ બેદી માટે નવા પ્રોજેક્ટ્સના દ્વાર પણ ખોલી દીધા છે અને તેમણે ઉજ્જૈનમાં જ પોતાના નવા પ્રોજેક્ટનું શૂટિંગ પણ શરૂ કરી દીધું છે.
નોંધનીય છે કે રાકેશ બેદીએ ટેલિવિઝન અને ફિલ્મોમાં દાયકાઓ સુધી કામ કર્યું છે, પરંતુ 'ધુરંધર' શ્રેણીએ તેમને એક નવું પ્લેટફોર્મ પૂરું પાડ્યું છે. હવે જ્યારે ત્રીજો ભાગ બનવાનો નથી એવી સ્પષ્ટતા થઈ ગઈ છે, ત્યારે ચાહકો રાકેશ બેદીને તેમના નવા આગામી પ્રોજેક્ટ્સમાં જોવા માટે આતુર છે.