મુંબઈ : તાજેતરમાં યોજાયેલા 'સ્ક્રીન એવોર્ડ્સ'માં પ્રથમ વખત હોસ્ટ તરીકે નસીબ અજમાવનાર આલિયા ભટ્ટને સોશિયલ મીડિયા પર ભારે ટીકાઓનો સામનો કરવો પડ્યો હતો. ઘણા યુઝર્સે તેના પરફોર્મન્સને "ઓવરએક્ટિંગ" અને "નર્વસ" ગણાવ્યું હતું. જોકે, બોલીવુડની બેબાક ગાયિકા સોના મહાપાત્રાએ આલિયાની ટીકા કરનારાઓને આડે હાથ લીધા છે અને લાઈવ પરફોર્મન્સના પડકારો વિશે ખુલીને વાત કરી છે.
લાઈવ સ્ટેજ અને બોલીવુડના ઠંડા પ્રેક્ષકો
સોના મહાપાત્રાએ બુધવારે એક વીડિયો જાહેર કરીને જણાવ્યું હતું કે, લાઈવ સ્ટેજ પર કોઈ રીટેક કે ફિલ્ટર હોતા નથી. આલિયાએ માઈક પકડવાની હિંમત કરી તે જ એક મોટો સ્ટંટ છે, કારણ કે મોટાભાગના દેશી કલાકારો આવું કરવાની હિંમત પણ નથી કરતા. સોનાએ વધુમાં ઉમેર્યું કે, સમસ્યા આલિયાના હોસ્ટિંગમાં નથી, પરંતુ સામે બેઠેલા બોલીવુડના પ્રેક્ષકોમાં છે. તેણે આ પ્રેક્ષકોને 'મૃત' (Dead) સમાન ગણાવ્યા હતા જેઓ કોઈ સારા હેતુ માટે ભેગા થયા હોય ત્યારે પણ ઉત્સાહ બતાવતા નથી.
સેલ્ફી મોડ ચાલુ, સહાનુભૂતિ બંધ
સોનાએ પોતાના અનુભવો શેર કરતા કહ્યું કે, આવા એવોર્ડ શોમાં બેઠેલા સેલિબ્રિટીઝ માત્ર એ જ વિચારમાં હોય છે કે મારો ડ્રેસ બીજા કરતા સારો છે કે નહીં, અથવા હું કયા ડાયરેક્ટરની નજરમાં આવી શકું છું. સોનાના મતે, રણવીર સિંહ જેવા જૂજ કલાકારો જ છે જે ખરેખર કંઈક અનુભવે છે અને પરફોર્મરને પ્રોત્સાહન આપે છે. બાકીના બધાનો 'સેલ્ફી મોડ' ચાલુ હોય છે અને કલાકાર પ્રત્યેનો 'સહાનુભૂતિ મોડ' બંધ હોય છે.
ઝાકિર ખાન સાથેની સરખામણી ખોટી
લોકો દ્વારા આલિયાની સરખામણી સ્ટેન્ડ-અપ કોમેડિયન ઝાકિર ખાન સાથે કરવામાં આવી રહી હતી, જેનો પણ સોનાએ વિરોધ કર્યો હતો. તેણે કહ્યું કે ઝાકિર સ્ટેન્ડ-અપનો ઉસ્તાદ છે, પરંતુ જો તેને આલિયાની જેમ એક્ટિંગ કે ડાન્સ કરવાનું કહેવામાં આવે તો ખબર પડે. દરેકની પોતાની આવડત હોય છે અને એક અભિનેત્રી તરીકે આલિયાએ જે પ્રયાસ કર્યો તે પ્રશંસનીય છે.
સોનાએ અંતમાં આલિયાને પ્રોત્સાહન આપતા બોલીવુડના કલાકારોને ટકોર કરી હતી કે, "થોડું હસવાનું શીખો, એ તમને મારી નાખશે નહીં." સોના મહાપાત્રાના આ આક્રમક બચાવ બાદ હવે સોશિયલ મીડિયા પર આલિયાના હોસ્ટિંગ કરતા બોલીવુડના 'ઠંડા' પ્રેક્ષકો વિશે વધુ ચર્ચા જાગી છે.