હૈદરાબાદ : 'બાહુબલી' અને 'RRR' જેવી બ્લોકબસ્ટર ફિલ્મો આપીને વિશ્વભરમાં ડંકો વગાડનાર દિગ્ગજ દિગ્દર્શક એસ.એસ. રાજામૌલી હવે પોતાના આગામી મહત્ત્વાકાંક્ષી પ્રોજેક્ટ 'વારાણસી' સાથે ફરી એકવાર સિનેમા જગતને ચોંકાવવા તૈયાર છે. સુપરસ્ટાર મહેશ બાબુ સાથેની આ ફિલ્મની વાર્તાને લઈને ચાહકોમાં લાંબા સમયથી ઉત્સુકતા હતી, જેના પર હવે પડદો ઊંચકાયો છે. રાજામૌલીના પિતા અને જાણીતા લેખક વિજયેન્દ્ર પ્રસાદે આપેલા સંકેતોએ આ ફિલ્મને લઈને ચર્ચાઓનું બજાર ગરમ કરી દીધું છે.

પૌરાણિક કથાને આધુનિક ટચ

મળતી માહિતી મુજબ, આ ફિલ્મનો મુખ્ય આધાર ભગવાન રામ અને કુંભકર્ણ વચ્ચેના સંઘર્ષ પર ટકેલો છે. જોકે, ફિલ્મમાં આ પૌરાણિક પાત્રોને સીધેસીધા દર્શાવવાને બદલે તેમને એક મોર્ડન અને કાલ્પનિક સંદર્ભમાં રજૂ કરવામાં આવશે, જે પ્રભાસની 'કલ્કી'ની સફળતાને પણ ટક્કર આપી શકે તેવી ભવ્યતા ધરાવતું હશે. ફિલ્મમાં મહેશ બાબુ એક એવા પાત્રમાં જોવા મળશે જે રામ જેવા આદર્શોનું પ્રતિબિંબ પાડે છે, જ્યારે પૃથ્વીરાજ સુકુમારન કુંભકર્ણ જેવા શક્તિશાળી અને પ્રભાવશાળી વિલન કે પ્રતિસ્પર્ધીની ભૂમિકામાં જોવા મળી શકે છે.

દિગ્ગજ કલાકારોની ફોજ અને ભવ્ય કેનવાસ

'વારાણસી' માત્ર વાર્તા માટે જ નહીં, પણ તેની સ્ટારકાસ્ટ માટે પણ ચર્ચામાં છે. મહેશ બાબુ લીડ રોલમાં છે, તો તેમની સાથે પ્રિયંકા ચોપડા જોનસ, પૃથ્વીરાજ સુકુમારન અને પ્રકાશ રાજ જેવા દિગ્ગજ કલાકારો સ્ક્રીન શેર કરતા જોવા મળશે. ફિલ્મનું 50 ટકા શૂટિંગ પૂર્ણ થઈ ગયું છે અને હાલમાં સૌથી મોટા અને ખર્ચાળ એક્શન સીક્વન્સ પર કામ ચાલી રહ્યું છે.

આઈમેક્સ અને વીઝ્યુઅલ ઈફેક્ટ્સનો જાદુ

રાજામૌલીની ફિલ્મો એટલે વિઝ્યુઅલ ટ્રીટ! 'વારાણસી'ને સ્પેશિયલ આઈમેક્સ ફોર્મેટમાં શૂટ કરવામાં આવી રહી છે, જેથી દર્શકોને સિનેમા હોલમાં એક અદભુત અનુભવ મળી શકે. આ ફિલ્મમાં અત્યાર સુધીના સૌથી ઉચ્ચ કક્ષાના વીઝ્યુઅલ ઈફેક્ટ્સ (VFX) નો ઉપયોગ કરવામાં આવશે, જે તેને હોલીવુડના ભવ્ય પ્રોજેક્ટ્સની હરોળમાં મૂકી દેશે.

દિગ્દર્શકની કુશળતા અને વિજયેન્દ્ર પ્રસાદની કલમનો સંગમ જ્યારે પડદા પર આવશે, ત્યારે શું નવો ઇતિહાસ રચાશે? તે જોવું અત્યંત રસપ્રદ રહેશે. ફિલ્મના શૂટિંગના તબક્કાને જોતા, આ ફિલ્મ ભારતીય સિનેમા માટે એક સીમાચિહ્નરૂપ સાબિત થશે તેવી પૂરેપૂરી શક્યતા છે.